DILI, 26 Novembru 2025 (TATOLI)—Polísia Nasionál Timor-Leste (PNTL) liuhusi Diresaun Tránzitu Seguransa Rodoviária Nasionál rejista asidente tráfiku hamutuk 1.870, husi Janeiru to’o Outubru 2025.
“Husi Diresaun Tránzitu Seguransa Rodoviária Nasionál atu informa nomós relata ba hothotu katak husi Tránzitu Nasionál bazeia ba rekapitulasaun dadus sira mai husi Komandu Munisípiu sira, Janeiru to’o Outubru ba kazu asidente hamutuk 1.870,” Diretór Tránzitu Seguransa Rodoviária Nasionál, Superintendente Xefe Polísia António Mauluta informa ba Jornalista sira iha ninia knaar fatin, Komandu Jerál PNTL, Kaikoli, Kuarta ne’e.
Husi kazu ne’e, kanek kama’an kompostu husi ema na’in-158, kanek grave iha ema nain-332, rezulta ema na’in-86, investigasaun finál 25, sei iha hela faze investigasaun hamutuk-970, ba ona Tribunál hamutuk 71 no rezolve família hamutuk 804.
Notísia relevante : MI rejista insidente-asidente 79 iha Setembru nia rohan
Aleinde ne’e, iha kazu asidente únika hanesan ema sira monu mesak ho motór laiha suspeitu ne’e mak iha kazu 25.
“Ita halo avaliasaun husi kazau sira ne’e, ne’ebé mak ita haree a’as liu mak husi fatór umanu, iha fatór umanu iha 85% ita haree fali fatór kondisaun karreta no motór ladi’ak 5%, fatór dalan 5% nomós fatór natureza 5%,“ nia relata.
Komandante Mauluta dehan, haree ba númeru fatór umanu ne’ebé kontribui maka’as ba asidente, ho nune’e mak Diresaun Tránzitu Seguransa Rodoviária Nasionál daudaun ne’e serbisu hamutuk ho Diresaun Nasionál Transporte Terrestre hodi halo sensibilizasaun kona-ba tránzitu iha Munisípiu Baukau Manufahi, Ermera, Kovalima.
“Ita-nia sensibilizasaun ba joven no estudante sira ne’ebé husi nível sekundária nomós ba ita-nia kondutór sira, liliu ba disiplina atu uza transporte atu tama ba estrada públiku,” nia tenik.
Iha sensibilizasaun ne’e esplika m’os kona-ba sinais tránzitu, liliu atu esplika ba joven sira nomós ba kondutór sira liga ba sinais tranzitu veritikál no orizontál no ba iha regra semáforu nian.
Nia katak, programa sensibilizasaun ba joven, estudante sira husi sekudária no kondutór sira ba lei seguransa rodaviária ne’e sei kontinua hodi nune’e ema bele utiliza motór no karreta ho kuidadu.
Jornalista : Natalino Costa
Editora : Julia Chatarina
