MI rejista insidente-asidente 79 iha Setembru nia rohan
DILI, 02 Outubru 2025 (TATOLI)—Portavós Seguransa Ministériu Interiór (MI), Superintendente Asistente Polísia Mouzinho Correia, informa durante iha loron 22 to’o 27 Setembru 2025 ne’e, MI konsege rejista insidente no asidente hamutuk 79.
“Insidente sira durante semana ida-ne’e nia laran, iha insidente no asidente ne’ebé akontese iha Territóriu Nasionál Timor-Leste, ita rejista hamutuk 79,” Portavós ne’e hateten liuhusi konferénsia imprensa ne’ebé hala’o iha edifisiu MI, Vila-Verde, ohin.
Nia dehan, insidente ne’ebé MI rekolla bazeia ba sistema Jestaun Insidente Polísia Nasionál Timor-Leste (PNTL) ne’ebé instala iha komandu 14 iha munisípiu sira hotu.
“Insidente sira-ne’ebe númeru aas liu (Tipu 5) iha semana dahaat mak asaltu malu hamutuk 27, Violénsia Doméstika hamutuk 21, Asaltu Seksuál hamutuk hitu (7), Furtu agravadu lima (5) no Ameasa lima (5). Insidente barak liu akontese iha área Munisípiu Dili, tuir fali Vikeke no Oekusi,” nia esplika.
Husi insidente 79 ne’e, nia dehan, hamosu tipu krime hamutuk 101 mo krime hirak ne’e aas-liu mak top lima (5) iha semana daha’at mak hanesan ofensa ba integridade fízika simpes 25, tuir fali maus tratus ba kónjuje 14, danu simples 10, ameasa 10 no abuzu seksuál ba menoriadade hamutuk haat (4).
Iha parte seluk kona-ba Asidente Tráfegu iha fulan-Setembru nia rohan hamutuk 47 ne’ebé akontese iha territóriu nasionál.
Aleinde ne’e, nia informa, Ministériu Interiór (MI) hatama mós reseita ba kofre Estadu liuhusi Infrasaun Tránzitu no sirkulasaun transporte estranjeiru no infrasaun lei kódigu estrada hamutuk $43, 729.00
Entretantu, tuir dadus husi Diresaun Nasionál Servisu Migrasaun ne’ebé kontrola no rejista movimentu ema estranjeiru tama no sai iha territóriu nasionál liuhusi dalan fronteira konsege rejista feto ne’ebé tama sai ho hamutuk na’in-9084 no mane na’in-9463.
Iha parte seluk, sidadaun estranjeiru na’in-ualu (8) mak envolve halo violasaun vistu iha Timor-Leste no parte Servisu Migrasaun halo prosesu voluntáriu abandonadu.
Iha okaziaun ne’e, Portavoz ne’e mós lee-sai mensajen husi Minstru Interiór, Francisco da Costa Guterres, ba joven feto no mane, estudante husi nivel ensinu hotu liuliu ba ensinu sekundária no univeristáriu sira iha Timor-Leste tomak katak, nafatin tau aas sentidu Estadu nian, sentidu patriotizmu hodi kontribui ba pás no trankuilidade iha rai doben Timor-Leste.
“Joven no estudante sira, imi hotu iha pepél importante no krusiál tebes ba iha seguransa, pás no estabilide iha prosesu konstrusaun Estadu Direitu Demokrátiku. Nafatin kolabora ho Autoridade Polísiál no sai parseiru di’ak ho autoridade seguransa hodi hamutuk halo prevensaun ba krime sira-ne’ebé mai ho dimensaun oioin,” mia tatoli.
Jornalista : Hortencio Sanchez
Editór : Cancio Ximenes
