DILI, 26 Novembru 2025 (TATOLI)—Polísia Nasionál Timor-Leste (PNTL) liuhusi Diresaun Tránzitu Seguransa Rodoviária Nasionál rekolla $607.356 husi infratór kontra sinais tránzitu iha territóriu tomak, iha Janeiru to’o Outubru 2025.
“Iha infratór sira ne’ebé ba selu ona iha banku hamutuk 17.755, nune’e maka hetan osan $607.00356. Ba infratór sira ne’ebé mak seidauk selu hamutuk ema nain-1.644,” Diretór Tránzitu Seguransa Rodoviária Nasionál Superintendente Xefe Polísia António Mauluta informa Jornalista sira iha ninia knaar fatin, Komandu Jerál PNTL, Kaikoli, Kuarta ne’e.
Notísia relevante : Apreensaun ne’ebé tránzitu halo tanba falta konsiénsia
Nia relata, bazeia ba pasa revista iha kada munisípiu sira, konsege halo apreensaun ba transporte públiku hamutuk 1.085, karreta privadu 3.041 no karreta Estadu 71.
Movimentu karreta tama-sai fronteira
Diresaun ne’e mós konsege rekolla $185.956 husi movimentu karreta tama-sai fronteira iha Janeiru-Outubru 2025.
Reseita rekolla husi postu entrada haat, Postu Batugade, postu Mota-Masin, Postu Sakato no Postu Oesilo.
Rejista mós movimentu transporte ne’ebé tama no sai iha fronteira hanesan karreta pezadu hamutuk 6.164 to’o Outubru ne’e.
Jornalista : Natalino Costa
Editora : Julia Chatarina
