SEFOPE presiza toma atensaun ba kandidatu traballadór foun ne’ebé seidauk hetan oportunidade
DILI, 26 Novembru 2025 (TATOLI)-Deputadu husi Partidu Frente Revolusionária Timor-Leste Independente (FRETILIN), Antonino Doutel Sarmento, husu ba Sekretaria Estadu Formasaun Profisionál no Empregu (SEFOPE) atu toma atensaun ba kandidatu traballadór foun ne’ebé naran rejista ona iha sistema, maibé seidauk hetan oportunidade bá serbisu iha Austrália.
Nia simu lamentasaun barak husi kandidatu traballadór husi munisípiu hotu ne’ebé rejista husi tinan 2019 no iha 2024, SEFOPE rasik kontrata formadór sira hodi fó formasaun, maibé to’o agora la hetan oportunidade.
“SEFOPE rasik hateten sei tau prioridade ba kandidatu traballadór, más to’o ohin laiha resposta. Tanba tau atensaun liu ba traballadór sira iha tinan 2021 mai 2025 mak kontinua bá beibeik”, nia lamenta.
Diretór-Jerál SEFOPE, Carlito Rosário Cabral, rekoñese katak kandidatu barak mak naran tama ona sistema, maibé seidauk hetan kontaktu husi empreza sira hodi bá serbisu no Governu sei buka meiu.
“Prosesu nafatin la’o, timoroan balun laiha oportunidade ne’e, tanba dalabarak kompañia halo rekrutamentu fali ba traballadór tuan sira no kandidatu foun ne’e foti uitoan de’it, liuliu Austrália nian”, nia esplika.
Meiu ne’ebé SEFOPE halo mak kontaktu hela ho empregadór foun sira iha Austrália ne’ebé seidauk rekruta timoroan bá serbisu iha sira-nia empreza.
“Ami mantein dadus ka dokumentu husi kandidatu sira ne’ebé naran tama ona sistema, nune’e bainhira empregadór balun presiza traballadór timoroan ita sei fasilita sira tuir teste”, hateten.
Tuir dadus, empregadór husi Austrália ne’ebé daudaun ne’e halo akordu ho Timor-Leste liuhusi SEFOPE hamutuk 132.
Bazei ba dadus husi SEFOPE, husi 2012 to’o Marsu 2025, timoroan hamutuk rihun 18-resin mak hetan ona oportunidade bá serbisu iha Austrália. Husi númeru ne’e 4.500 mak daudaun kontinua serbisu no restante fila ona mai Timor-Leste. Traballadór timoroan ne’ebé sai ona husi sistema hamutuk 977.
Notísia relevante: SEFOPE garante transparénsia vaga RSE Nova Zelándia
Jornalista: Nelson de Sousa
Editora: Maria Auxiliadora
