DILI, 27 Novembru 2025 (TATOLI)-Autoridade Nasionál Petróleu (ANP) liuhusi Timor Gap no operadór PetroTim Resources, S.A, asina kontratu hodi halo esplorasaun no dezenvolve indústria petróleu iha Timor-Leste liuliu iha bloku B, hanesan munisípiu Ermera, Ainaru, Bobonaru no Kovalima.
Reprezentasaun husi Timor Gap, Maria Imaculada Conçeião, hateten Ministériu Petróleo no Rekursu Minerais liu husi ANP tama iha Kontratu Petroliferu bo PetroTim Resources, S.A, (PetroTim) ho nia parseiru empreza konjunta, TIMOR GAP Onshore Block B Unipesoál, Lda, atu hala’o atividade esplorasaun iha área kontratu ho bloku rezerva B.
Tanba, Autoridade Nasionál Petróleu (ANP) tuir Artigu 10 lei nú. 6/2019 loron 04 fulan-Dezembru, alterasaun daruak ba lei nú. 13/2005, loron 02 fulan-Setembru, kona- ba atividade petrolífera, no artigu 3.1 nú 26.1 dekretu-lei nú. 62/2023 loron 06 fulan-Setembru, alterasaun terseiru ba dekretu-lei nú. 20/2008 loron 19 fulan-Junu kona-ba estabelesimentu ANP.
“PetroTim nu’udar kompañia foun ida-neʼebé organiza no eziste tuir lei Repúblika Demokrátika Timor-Leste nian, enkuantu TIMOR GAP Onshore Block B Unipesoál, Lda, nu’udar subsidiária ida husi TIMOR GAP E.P, empreza Estadu nian iha Timor-Leste. Parte rua ne’e asina kontratu atu dezanvolve indústria petrolífera,” nia informa iha diskursu iha serimónia asina akordu ne’ebé realzia iha City 8, Manleuana, kuarta (26/11/2025) ne’e.
PetroTim ho nia parseiru empreza konjunta iha kompromisu atu ezekuta nia obrigasaun sira tuir kompromisu esplorasaun no konteúdu lokál tuir termu sira iha PSC nian no Dekretu-Lei Nú. 18/2020 loron 13 fulan-Maiu kona-ba pperasaun petróleu iha rai-laran (Onshore).
“Ami deseju PetroTim ho nia parseiru empreza konjunta, TMOR GAP Onshore Block B Unipesoál, Lda, hetan susesu iha sira-nia atividade Períodu esplorasaun dahuluk nian,” nia ddehan.
Nia hatutan, programa servisu esplorasaun mínimu hanaran períodu esplorasaun dahuluk fornese hanesan tuir tinan ida sei halo estudu jeológiku no jeofíziku, iha tinan rua halo levantamentu sísmiku 3D mínimu 250 kilómetru kuadradu ba prosesamentu sísmiku no interpretasaun sísmiku, no avaliasaun prospeitu, enkuantu iha tinan tolu sei fura posu esplorasaun ka posu esplorasaun sira ne’ebé kumulativu to’o kle’an mínimu metru 2000.
Jornalista : Alexandra da Costa
Editór : Cancio Ximenes
