FFTL rejeita hili família iha selesaun nasionál U-17
DILI, 27 Novembru 2025 (TATOLI)—Federasaun Futeból Timor-Leste (FFTL) rejeita hili família hodi reforsa ekipa Selesaun Nasionál Futeból Timor-Leste U-17 ne’ebé atualmente tuir kompetisaun kualifikasaun AFC Asian Cup iha Xina.
Prezidente FFTL, Nilton Gusmão haktuir komentáriu husi komunidade hadomi futeból iha rede sosiál konsideradu falta informasaun no seidauk hatene kle’an kona-ba prosesu hotu relasiona ho jogadór na’in-23 ne’ebé selesionadu iha ekipa nasionál U-17.
“Realmente nu’udár umanu ita-nia espetativa mak hakarak manán de’it maibé ida-ne’e la’ós fásil atu alkansa vitória,” Prezidente FFTL hateten iha Otél Luz Clarita, Bidau, Kinta ne’e.
Notísia relevante: FFTL husu públiku nafatin apoiu Selesaun Nasionál U-17
Nia relata jogadór hirak-ne’e selesionadu bazeia ba rezultadu kompetisaun Kopa Juveníl ne’ebé hahú iha meadu tinan-ne’e tuir idak-idak ninia munisípiu no reprezenta iha rejionál antes deside iha nasionál no ikus mai deside hamutuk na’in-23 mak liu selesaun.
Eis Prezidente Liga Futeból Amadora Timor-Leste (LFA) ne’e konsidera krítika ne’ebé lansa iha rede sosiál parte husi espresaun tanba iha espetativa ba prestasaun futeból Timor-Leste liuliu hafoin selesaun nasionál U-17 derrota ho skor boot hasoru Xina no Bangladés.
Tuirmai lista Jogadór U-17 ne’ebé selesionadu iha ekipa nasionál Timor-Leste:
Guarda rede : João Baptista (Dili), Joel Novo (Bobonaru), Levendinho Casimiro (Ermera).
Defeza : Bendito Misa (Ainaru), Dramicio (Baukau), Filomeno, Geovanio (Likisá), Inigo Martins (Manufahi), Florindo Magno (Dili), Jacob Maia (Emera), Gabriel Carvalho (Ermera), Reinaldo Viegas (Ermera).
Médiu : Quevin Ximenes (Lautein), Paulo Brás (Dili), Jeremias (Bobonaru), Jerónimo Nono (Oekusi), Elton (Oekusi), Gilson Costa (Dili).
Avansadu : Augusto Ximenes (Vikeke), Manuel da Silva (Manufahi), Frenky Santos (Dili), Jyzeus Lay (Dili), Germano da Silva (Dili).
Jornalista: Natalino Belo
Editór: Xisto Freitas da Piedade
