MAPPF-Autoridade Vikeke lansa kuda salak iha Tahu Been
VIKEKE, 27 Novembru 2025 (TATOLI)–Ministru Agrikultura, Peska, Pekuária no Floresta (MAPPF), Marcos da Cruz hamutuk ho Prezidente Autoridade Munisípiu (PAM) Vikeke, Francisco C. S. de Gonzaga Soares, Kinta ne’e, lansa kuda salak iha área Tahu Been, Suku Uma-Ki’ik, Postu Vikeke Vila, Munisípiu Vikeke.
Iha lansamentu kuda salak ne’e, Ministru Marcos da Cruz hateten MAPPF hamutuk ho grupu agrikultura Tahu Been hahú kuda ai-fuan salak ne’ebé okupa rai ektare tolu (3), ida-ne’e sai hanesan programa importante.
“Ita mós hakarak dezenvolve ai-horis sir-ne’ebé bele prodús ai-fuan sira hanesan salak, haas, ai-dila no seluk tan,” Marcos da Cruz ba jornalista sira hafoin ramata kuda salak.
Notísia relevante: MAPPF sei kuda salak hun 4.000 iha Vikeke
Governante ne’e haktuir molok kuda salak tékniku sira husi MAPPF halo ona avaliasaun ba klima iha área Tahu Been.
Nia informa sei espande mós ai-horis seluk hanesan programa kuda haas, rambutan, tanzeriña no sira seluk tan.
“Ha’u hakarak husu agrikultór sira kolabora ho Governu no autoridade lokál hodi dezenvolve ita-nia rai liuliu dezenvolve setór agrikultura,” nia hato’o.
Iha fatin hanesan, Prezidente Autoridade Munisípiu (PAM) Vikeke, Francisco C. S. de Gonzaga Soares, enkoraja agrikutór sira kuidadu ai-oan salak ne’ebé Governu liuhusi MAPPF oferese no tenke kuidadu ai-horis ne’e tanba la’os ema hotu hetan hanesan ne’e.
“Agrikutór sira tenke tau-matan no kuidadu ba salak ne’ebé ohin ita kuda uluk ona 3.000 tanba iha futuru bele hadi’a kreximentu ekonomia família,” nia fó-hanoin.
Aleinde ne’e, Koordenadór Grupu Tahu Been, Jeremias Gomes sente kontente tanba Governu apoia fini salak ba grupu Tahu Been hodi kuda no salak ne’ebé kuda hamutuk 3.000 grupu sei tau-matan to’o salak kolleta.
Lansamentu kuda salak ne’e partisipa husi ekipa MAPPF nasionál inklui munisípiu Vikeke, autoridade lokál, organizasaun TOMAK, FAO, Komadante Polísia Nasionál Timor-Leste (PNTL) Munisípiu Vikeke no agrikultór Suku Uma-Ki’ik.
Jornalista: Vitorino Lopes da Costa
Editór: Xisto Freitas da Piedade
