BOBONARU, 27 Novembru 2025 (TATOLI)-Xefe suku Lahomea, postu administrativu Maliana, Cirilio Mau Leto, husu ba Ministériu Justisa (MJ) atu orienta Servisu Notariadu munisipál halo rejistu móvel ba suku 50 iha Bobonaru hodi hakbesik atendimentu ba komunidade sira ne’ebé hela iha área remota.
Cirilio Mau Leto hato’o preukupasaun ne’e tanba durante tinan barak ona atendimentu sentraliza de’it iha kapitál munisípiu nian hodi difikulta komunidade, liuliu idozu no ema ho defisiénsia sira atu trata dukumentu sira ne’e.
Notísia relevante: Komputadór iha Konservatóriu Rejistu Sivíl Bobonaru limitadu
“Ha’u rekomenda karik bele parte Justisa halo servisu móvel ba kada postu, depois BI ne’e to’o ohin loron sei kaer mak ida provizóriu. Bainhira mak atu iha blanku orijinál?”, nia kestiona asuntu ne’e iha atividade reflesaun no mini diálogu ne’ebé realiza iha salaun Maria Tapó.
Diretór Komisaun Nasionál Eleisaun Delegasaun Territoriál Munisípiu Bobonaru, Juvito Ramos, dehan problema ne’e órgaun eleitorál mós identifika liuhusi atividade edukasaun sivíka iha baze.
“Sira barak mak preokupa, liuliu atu asesu ba iha dokumentu BI, RDTL no pasaporte. Ita-nia inan-aman sira laiha kbiit atu hakat to’o munisípiu hodi hetan dokumentu tolu ne’e. Agora, STAE la’o hela atu troka kartaun eleitorál ba sistema biométriku, bainhira sira atu atualiza pelu menus tenke iha dokumentu tolu ne’e. Entaun, barak mak laiha, tanba atendimentu konsentra de’it iha munisípiu”, nia afirma.
Biban ne’e, Ministru Justisa, Sérgio Hornai, rekoñese problema ne’e iha no sei buka meiu atu rezolve. “Oinsá atu lori servisu Justisa ba rejistu besik ba komunidade, sidadaun hotu-hotu iha direitu atu hetan atendimentu”, nia garante.
Kona-ba asuntu BI provizóriu, antigu Komisáriu Anti-Korrupsaun ne’e esklarese katak Governu to’o agora seidauk bele halo emisaun ba blanku orijinál, tanba hakarak introdús dadus ho sistema dijitál.
“Ita atu ajusta ho ita-nia polítika nasionál nia ba iha ICAO. Buat ida ema dehan dijitaliza tuir demanda ne’ebé organizasaun internasionál ICAO haruka ba ita. Ita-nia BI anteriór seidauk uza barcode, entaun ita komesa ona iha hanoin atu muda mezmu iha konsumu lokál de’it. Bainhira ita introdús polítika kona-ba blanku ba BI konserteza ita sei la’o ho ida-ne’e, sei subtitui hanesan ho eleitorál nia”, governante ne’e esplika.
Vise-Ministru Fortalesimentu Institusionál, Paulo Remédios, reforsa katak atu hatán ba problema ne’e MJ serbisu hamutuk ho Ministériu Administrasaun Estatál inklui ona serbisu ne’e iha programa Balkaun Úniku ne’ebé hala’o ona iha munisípiu balun no iha futuru sei establese mós iha Bobonaru.
“Balkaun Úniku ne’e atu fó apoia ba Ministériu Justisa ba Rejistu Notariadu kona-ba dokumentu tolu ne’e. Balkaun Úniku mós iha karreta movél ida no motorizada rua atu asesu ba área remota sira. Problema sira ne’ebé sei falta, iha Diresaun Notariadu orsamenta ona iha 2026, ita sei rezolve hodi redús tan atrazu iha dokumentu no ekipamentu ne’ebé ita presiza”, adianta.
Iha 2024, Diresaun Konservatóriu Servisu Rejistu Notariadu Munisípiu Bobonaru halo ona rejistu iha postu administrativu Balibó no Atabae no emite ona BI no Sertidaun Moris ba ema ho defisiénsia no idozu na’in-909.
Program ne’e implementa atu hakbesik servisu adminsitrasaun ba baze hodi fasilita idozu no ema ho defisiénsia sira asesu ba dokumentu importante sira, tanba kestaun distánsia no saúde la permite sira mai direta trata dokumentu iha edifísiu DSKRN munisípiu Bobonaru, maibé to’o agora paradu tanba diresaun ne’e enfrenta hela problema laiha tranporte operasionál, internét no falta rekursu umanu.
Notísia relevante: Rejistu Notariadu Bobonaru seidauk implementa rejistu movél iha postu administrativu
Jornalista: Sergio da Cruz
Editora: Maria Auxiliadora
