DILI, 27 Novembru 2025 (TATOLI)—Xefe Departamentu Imunizasaun iha Ministeriu Saúde, Maria Angelina Pereira, hateten vasina antí raiva estoke sufisiente hodi atende ba kazu raiva ka pasiente sira-ne’ebé asu tata.
Notísia Relevante: OMS apoiu vasina anti Raiva doze 10.000 ba Ministériu Saúde
“Agora daudaun vasina antí raiva ita sufisiente hela, hodi atende ba ema sira-ne’ebé mak asu tata,” Maria Angelina Pereira hateten ba jornalista sira iha nia kna’ar fatin, ohin.
Vasina antí raiva sufisiente tanba Governu Timor-Leste servisu hamutuk ho parseiru sira hanesan Organizasaun Mundiál Saúde no UNICEF, nune’e fó apoiu mós husi Embaixada Indonézia iha Timor-Leste.
“Ita-nia estoke agora daudaun iha INFPM ne’e hamutuk 1.525, maibé iha doasaun India mós haruka mai ona, totál hira mak ita seidauk hatene. Depois mak ita-boot sira konfirma ho INFPM hodi esplika diak liután,” nia dehan.
Nia relata, kazu pozitivu raiva mosu nafatin iha Munisípiu hitu (7) hanesan RAEOA, Bobonaru, Likisá, Ermera, Manufahi, Manatutu no munisípiu Kovalima.
“Munisípiu hitu ne’ebé afetadu estoke vasina antí raiva sufisiente iha sira-nia fatin, atu nune’e banhira asu tata ema tenke simu lalais vasina refere. Agora, munisípiu seluk ne’ebé mak seidauk iha kazu ne’e INFPM mós distribui ona vasina ba sira-nia fasilidade saúde, atu nune’e kazu ne’ebé mak asu tata sira diretamente simu vasina,” nia hateten.
Jornalista : Felicidade Ximenes
Editór : Cancio Ximenes
