Komemora Loron Proklamasaun Independénsia RDTL, Ministru Marcos husu populasaun kria estabilidade
VIKEKE, 28 Novembru 2025 (TATOLI)–Ministru Agrikultura, Peska, Pekuária no Floresta, Marcos da Cruz solisita populasaun iha Munisípiu Vikeke matein pás no estabilidade hodi kontribui ba dezenvolvimentu.
“Ohin ita selebra Loron Proklamasaun Independénsia RDTL ba da-50, ida-ne’e sai hanesan serimónia ida hodi rekoñese ita-nia eroi no luta-na’in sira-nia esforsu no sakrifísiu hodi harii nasaun ida. Husi selebrasaun ida-ne’e, ita atu haree filafali saida mak ita halo ona. Durante ne’e ita-nia atinjimentu barak hanesan área sosiál, seguransa, dezenvolvimentu ekonomia no integrasaun ba organizasaun rejionál ASEAN. Tan ne’e, husu povu nafatin mantein kondisaun ida pás no estabilidade hodi fó fatin ba dezenvolvimentu iha ita-nia rai atubele atinje ita-nia objetivu ba moris di’ak,” Ministru Marcos hateten ba jornalista sira hafoin ramata isár bandeira nasionál iha kampu futeból Vikeke Vila, Sesta ne’e.
Governante ne’e dehan parte Governu sei kontinua esforsu hamutuk ho instituisaun Estadu nian hodi dezenvolve nasaun Timor-Leste hahú husi nivel nasionál to’o baze liuhusi setór sira hanesan edukasaun, saúde, infraestutura (estrada, bee-moos, eletrisidade) no agrikultura.
Notísia relevante: Ministru Marcos distribui vestuáriu ba estudante isár bandeira
Iha fatin hanesan, Prezidente Autoridade Munisípiu (PAM) Vikeke, Francisco C. S. de Gonzaga Soares, haktuir selebrasaun tinan 50 Proklamasaun Independénsia ne’e povu presiza servisu ho Governu no autoridade hodi lori dezenvolvimentu ba oin.
“Libertasaun pátria ita liu ona, nune’e ita iha faze libertasaun povu. Tan ne’e, ha’u husu ba povu Vikeke mai ita servisu hamutuk hodi konkretiza libertasaun povu,” nia hato’o.
Entretantu, inspetór ba serimónia isár bandeira ba loron importante iha Vikeke ne’e Konsellu Ministru delega Ministru Agrikultura, Peska, Pekuária no Floresta, Marcos da Cruz mak asumi, akompañadu husi Sekretáriu Estadu Peska, Sekretáriu Estadu Floresta no partisipa husi veteranu Vikeke, autoridade lokál, komandante PNTL Munisípiu Vikeke, funsionáriu, estudante no populasaun.
Jornalista: Vitorino Lopes da Costa
Editór: Xisto Freitas da Piedade
