VIKEKE, 27 Novembru 2025 (TATOLI)–Ministru Agrikultura, Peska, Pekuária no Floresta (MAPPF), Marcos da Cruz hamutuk ho Prezidente Autoridade Munisípiu (PAM) Vikeke, Francisco C. S. de Gonzaga Soares, Kinta ne’e, distribui vestuáriu ba estudante isár badeira ba selebrasaun Loron Proklamasaun Independénsia RDTL ba da-50 (28 Novembru 1975-28 Novembru 2025), iha Suku Luka, Postu Vikeke Vila.
Iha distribuisaun ne’e, Ministru Marcos hato’o agradesimentu ba autoridade sira iha Munisípiu Vikeke tanba organiza estudante sira hodi komemora loron importante ne’e.
“Tanba ne’e, ohin ha’u mai hasoru estudante sira iha parte suku Luka nian hodi distribui vestuáriu sira-ne’ebé aban ita-nia estudante sira uza ba hasa’e bandeira hanesan xapeo, meais no seluk tan,” nia esplika.
Governante ne’e husu estudante sira iha Luka tenke respeita bandeira nasionál no respeita loron istóriku sira husi ohin bá-oin, nune’e mós respeita eroi libetasaun sira-ne’ebé luta ba ukun rasik-aan.
Entretantu, Administradór Postu Vikeke Vila, Leopoldo da Costa Alves, hato’o agradesimentu ba Ministru Agrikultura Peska, Pekuária no Floresta ne’ebé to’o iha Suku Luka hodi distribui vestuáriu isár bandeira nian ba estudante sira.
“Durante ne’e ita seidauk realiza atividade ruma iha Suku Luka no ida-ne’e hanesan foin primeiravéz,” nia subliña.
Nia haktuie, orsamentu ne’ebé aloka ba Postu Vikeke Vila hamutuk $1.500 no hetan apoia fundu husi MAPPF hamutuk $3.000 ba komemorasaun ne’e ne’ebé Postu Vikeke Vila realiza iha Suku Luka.
Leopoldo dehan husi orsamentu ne’e aloka ba serimónia inkui atividade kompetisaun sira hanesan sa’e bua, dada tali entre feto no mane, tata berlindus, tata jambua no kompetisaun tahek foos.
Iha fatin hanesan, reprezentante estudante isár bandeira husi Suku Luka, António Morinho dos Santos Guterres, sente kontente tanba Ministru Agrikultura bele direta vizita estudante sira-nia preparasaun ba isár bandeira no distribui vestuáriu ba estudante sira.
Isár bandeira iha Suku Luka responsabiliza husi estudante hamutuk na’in-65 husi Eskola Filiál Santu Estevão.
Iha distribuisaun vestuáriu ba isár bandeira ne’e partisipa husi autoridade lokál, bombeiru,membru Polísia Nasionál Timor-Leste (PNTL), veteranu no komunidade husi Suku Luka.
Jornalista: Vitorino Lopes da Costa
Editór: Xisto Freitas da Piedade
