DILI, 28 novembru 2025 (TATOLI) – Ema na’in-13 dezmaia, iha ámbitu komemorasaun Proklamasaun Independénsia ba dala-50. Ema hirak ne’e kompostu husi membru Forsa Defeza Timor-Leste (F-FDTL) 11, Polísia Nasionál Timor-Leste (PNTL) na’in-ida, inklui partisipante ida.
“Ohin ne’e ita la’ós halo atendimentu de’it ba membru F-FDTL maibé iha mós polísia ida no partisipante VIP. Se la sala veteranu, lae diretór balun. Sira ne’e ita atende la’ós ho moras, ne’ebé alta ita hatene loron manas. Dalaruma sira mai maibé la matabisu ho nunee sira-nia raan masin-midar tuun”, Diretór SNAEM,I.P, Simplício Amaral relata ba jornalista sira iha resintu Palásiu Governu, ohin.
Ezekutivu Servisu Nasionál Ambulánsia no Emerjénsia Médika (SNAEM,I.P) ne’e akresenta, ba pasiente na’in-14 ne’e la transporta ba Hospital Nasional Guido Valadares (HNGV), tanba sira oin halai de’it.
“Sira hirak ne’e la’ós moras grave maibé oin halai de’it. Dalaruma kalan toba tarde, ohin dadeer la matabisu ho nune’e forsa la iha entaun dezmaia”, nia akresenta.
Diretór ne’e mós informa para Servisu Nasionál Ambulánsia Emerjénsia Médika prepara rekursu umanu ba iha eventu ne’e iha médiku na’in-ida, enfermeiru lima no Kondutór ambulánsia rua.
Jornalista: Ivonia da Silva
Editór: Rafael Ximenes de A. Belo
