Ministru Justisa enkoraja foinsa’e atu harii TL ida forte no dignu
BOBONARU, 28 Novembru 2025 (TATOLI) – Ministru Justisa, Sérgio Hornai, husu ba joven hotu-hotu iha Timor-Leste (TL) atu hola papél boot liu iha prosesu dezenvolvimentu nasionál, koinside ho aniversáriu Proklamasaun Independénsia ba da-50.
Ministru subliña katak meiu sékulu independénsia tenke sai momentu ida hodi hametin unidade nasionál no reafirma responsabilidade jerasaun foun nu’udar susesór ba ideál sira kombatente libertasaun nian.
“Ita tama ba tinan 50 Proklamasaun Independénsia nian, ha’u konvida jerasaun foun sira atu prepara-an, kontribui, no harii ita-nia nasaun sai país ida ne’ebé forte, unidu, no dignu”, nia afirma hafoin serimónia isár bandeira iha kampu futeból Maliana, ohin.
Ministru mós hato’o mensajen Prezidente Repúblika, José Ramos-Horta, nian hodi husu espíritu unidade lahó divizaun. Nia subliña katak dezenvolvimentu bele hetan de’it bainhira elementu hotu-hotu nasaun nian, inklui organizasaun naun-governamentál sira, opozisaun, no públiku ein jerál kompartilla vizaun komún ida ba progresu nasaun nian.
“Hamutuk laiha ema ida maka retira. Ita maka na’in ba prosesu ne’e”, nia dehan hodi sita mensajen Xefe Estadu nian.
Governante ne’e mós hato’o nia apresiasaun ba komunidade Bobonaru ne’ebé mantein estabilidade no armonia maski lokaliza iha rejiaun fronteira. Nia fiar katak ambiente pasífiku ida-ne’e maka fundasaun krusiál ba dezenvolvimentu sustentavel.
Iha okaziaun ne’e, ministru Hornai destaka mós Bobonaru nia potensiál imensu, partikularmente iha setór rekursu naturál no turizmu.
Atu konklui, nia enkoraja komunidade mantein orden públika, hatudu unidade iha diversidade, no kria ambiente atrativu ba dezenvolvimentu no investimentu turizmu. “Ita presiza hatudu hahalok di’ak no unidade. Ne’e maka ita-nia unidade iha diversidade” nia hakotu.
Júlio Carvalho Caero, sobrevivente husi masakre 12 Novembru 1991 fó hanoin mós ba jerasaun foun sira atu labele haluha Timor-Leste nia istória luta ne’ebé naruk husi Proklamasaun Independénsia Unilaterál iha 28 Novembru 1975 to’o autodeterminasaun.
Tuir nia, maski Timor-Leste nia tamañu ki’ik no populasaun ki’ik, nasaun ida-ne’e prova ona iha kapasidade atu hamriik no mantein nia dignidade liuhusi determinasaun no sakrifísiu.
“Oportunidade di’ak ho selebrasaun tinan 50 ba Proklamasaun Independésia, ha’u husu ba alin juventude, jerasaun foun sira atu prepara-an hodi kontribui no dezenvolve ita-nia rai, ne’ebé mak erói sira hakarak Timór ne’e sai nasaun ida forte, unidade no dignu”, dehan.
Iha espíritu aniversáriu Proklamasaun Independénsia ba-50, Governu bolu fali juventude hotu-hotu atu kontinua prezerva legadu luta nian no garante katak Timor-Leste nia futuru harii iha unidade, pás, no integridade nasionál nia leten.
Notísia relevante: Sérgio Hornai: Servisu inkansavel ba povu no nasaun iha meiu sékulu Proklamasaun Independénsia
Jornalista: Sergio da Cruz
Editora: Maria Auxiliadora
