Sérgio Hornai: Servisu inkansavel ba povu no nasaun iha meiu sékulu Proklamasaun Independénsia
BOBONARU, 28 Novembru 2025 (TATOLI) – Ministru Justisa, Sérgio Hornai, husu ba dirijente sira iha Ministériu Justisa (MJ) no Autoridade Munisípiu Bobonaru ho estrutura sira hotu atu iha espíritu servisu inkansavel iha meiu sékulu Proklamasaun Independénsia Timor-Leste nian, 28 Novembru 1975-28 Novembru 2025 ba da-50.
Iha salaun Maria Tapó, Maliana, iha atmosfera refletivu, nia husu ba dirijente sira atu hamoris filafali valór luta bei’ala no erói sira ne’ebé sakrifika-an ba fundasaun Timor-Leste nian.
“Prosesu ida-ne’e atu relembra saida mak ha’u halo ona ba ha’u-nia povu no mos ha’u-nia nasaun. Ita la baruk, ita la kolen, biar sátan sira iha oin más ita fó hakat ba interese komún ninia prevalese ba ida ne’ebá. Ita la kolen atu hatete katak serví ba rai ida-ne’e, ba povu ida-ne’e”, ministru Hornai hateten.
Nia haktuir hikas momentu proklamasaun 28 Novembru nian, ne’ebé unilateralmente halo husi fundadór nasaun nian nu’udar pasu barani ida hodi deklara ba mundu katak Timor-Leste iha direitu atu sai nasaun independente. Tuir nia, desizaun istóriku ne’e tenke sai reflesaun ida ba jerasaun atuál.
Ministru mós subliña importánsia husi kolaborasaun entre líder sira husi Ministériu Justisa, Autoridade Munisípiu Bobonaru no xefe suku no xefe aldeia sira.
Nia haklaken katak komunidade tau espetativa boot ba Governu atu rezolve kestaun oioin, hanesan problema rai, dokumentu identidade, rejistu kriminál, moris, no mate.
“Povu hein hela ita, ita mak hanesan matan, tilun, ain, no kakutak ne’ebé bele rezolve sira-nia problema”, nia hateten
Nia mós fó hanoin katak viajen naruk luta nasionál nian envolve no sakrifika timoroan sira maizumenus rihun 200 ne’ebé iha estrutura FRETILIN tantu nu’udar líder no kolaboradór iha luta libertasaun nian.
Tanba ne’e, aniversáriu independénsia ba da-50 tenke sai momentu ida atu hametin rezolusaun, harii nasaun ida ne’ebé independente, livre, no soberana.
“Ohin,ita sente orgullu tanba hamutuk ho ami-nia erói sira ne’ebé monu. Sira dedika moris ba nasaun ida-ne’e, ita selebra independénsia ho ksolok, maibé ho responsabilidade boot”, nia hatutan.
Ministru hakotu ninia mensajen hodi konvida instituisaun hotu-hotu atu kontribui no serbisu hamutuk hodi fó apoiu ba Prezidente Autoridade Munisípiu Bobonaru hodi garante susesu série ba komemorasaun independénsia nian.
Aniversáriu meiu-sékulu proklamasaun independénsia ida-ne’e sai hanesan lembransa ida katak dedikasaun, unidade, no kompromisu maka xave atu harii Timor-Leste nia futuru.
Notísia relevante: MJ presiza hakbesik atendimentu rejistu móvel ba suku 50 iha Bobonaru
Jornalista: Sergio da Cruz
Editora: Maria Auxiliadora
