DILI 28 Novembru 2025 (TATOLI)–Prokuradór Jerál Repúblika, Nelson de Carvalho, hateten, Ministeriu Públiku (MP) daudaun ne’e konstitui ona ema hamutuk na’in-50 resin ba kazu Ró Haksolok.
“Ha’u lalika repete, imi hatene muito bem, imi rasik hatene liu tiha ha’u, 50-itál loos ga lae,” Nelson hatan ba Jornalista sira-nia perguntas hafoin partisipa iha kemorasaun tinan 50 Proklamasaun Independénsia unilaterál ne’ebé hala’o iha Palásiu Governu, Sesta ne’e.
Prokuradór iha biban ne’e lakohi temi sé de’it mak envolve iha kazu ne’e tanba ne’e liga ba segredu justisa.
“Ha’u labele hateten kazu ne’e envolve husi sé sé, tanba kestaun ida-ne’e pesoál ema di’ak idak ninian,” nia akresenta.
Notísia relevante : Jurista husu MP aselera prosesu investigasaun ba Ró Haksolok
Antes ne’e, Prokuradór Nelson rekoñese katak kazu Ró Haksolok ne’e ninian prosesu komplesu tebes, tanba ne’e la’o kleur maibé agora Prokuradór Titulár bele konklui ona nia prosesu sira.
Ró Haksolok ho kustu millaun €13,7, inaugura iha loron 26 maiu 2017 iha sidade Figueira da Foz, Portugal no tuir informasaun sei to’o Timor-Leste iha outubru 2017, maibé tanba problema internál hosi empreza Atlantic Eagle Ship Building ho sub-kontratór maka to’o agora ró seidauk mai.
Ró ne’e rasik iha kapasidade atu tula ema na’in-377 no karreta hamutuk 15.
Prosesu kontrusaun Ró Haksolok ninia kontratu asina iha tinan 2014 entre Governu no empreza portugués. Konstrusaun ró ne’e konsege parradu maibé bainhira estabelese Zona Espesiál Ekonomia Sosiál Merkadu (ZEESM), prosesu kontrusaun ró-ahi ne’e entrega ba Autoridade mak responsabiliza.
Desizaun atu hili ninia estalleiru (fatin atu harii ró) hahú no foti husi V Governu Konstitusionál, ne’ebé selebra kontratu ho estaleiro Atlantic Eagle Ship Building Lda. (Atlanticeagle) iha loron 22 setembru 2014.
RAEOA simu prosesu konstrusaun ró liuhusi transferénsia projetu no alokasaun orsamentu husi Governu Timor-Leste.
Parlamentu Nasionál (PN), liuhusi Komisaun C ne’ebé responsável ba Asuntu Finansa Públika, halo vizita bá Portugál iha Jullu ne’e hodi halo haree direta kondisaun Ró Haksolok no halo fiskalizasaun, ne’ebé to’o agora seidauk bele to’o Timor-Leste.
Antes ne’e, Komisaun C iha PN ne’ebé trata Asuntu Finansa Públika, alerta ba MP atu tau atensaun sériu ba kazu Ró Haksolok tanba bainhira membru komisaun halo vizita traballu iha loron 25 Jullu 2025 liubá iha fatin estaleiru Atlantic Eagle iha Portugál, nota iha irregularidade barak.
Tuir Komisaun C nia relatóriu fiskalizasaun, antes ne’e Parlamentu aprova orsamentu atu aloka ba ró ne’e dahuluk millaun $17, tuir fali millaun $14 no ikus kuaze millaun $4.
Jornalista : Natalino Costa
Editora : Julia Chatarina
