DILI, 28 Novembru 2025 (TATOLI)-Prezidente Guiné-Bissau ne’ebé hetan destituisaun, Umaro Sissoco Embalo, to’o ona iha Senegal ho seguru ho aviaun ne’ebé aluga hosi Governu, fó-sai hosi Ministériu Negósiu Estranjeiru Senegal nian iha loron-kinta kalan.
“Aviaun aluga hosi Governu hodi halo viajen ba Bisau atu nune’e bele tulun iha operasaun repatriasaun ne’e. Ida-ne’e permiti to’o seguru no di’ak iha Senegal hosi Prezidente Umaro Sissoco Embalo,” tenik ministériu ne’e liuhusi nota imprensa ida.
Dakar hatete katak iha kontaktu konstante ho atór sira Bisau-Guiné nian dezde krize polítika no golpe Estadu, foka liu ba libertasaun Embalo nian no sira seluk no loke fali fronteira sira hodi tulun repatriamentu hosi detidu sira no misaun observasaun eleitoral oioin.
Deklarasaun ne’e mosu hafoin simeira virtuál estraordináriu ida hosi Komunidade Ekonómika Estadu sira Áfrika Osidentál nian (CEDEAO) kona-ba golpe militár.
Iha loron-kuarta, iha komunikadu ida ne’ebé fó sai iha televizaun estatal, grupu ida hosi ofisiál militár sira ne’ebé identifika sira nia-an hanesan “Altu Komandu Militár ba Restaurasaun hosi Seguransa Nasional no Orden Públika” fó sai katak sira “asume ona kbiit tomak hosi Estadu”.
Militár suspende atividade hotu-hotu hosi mídia, hapara prosesu eleitorál ne’ebé la’o hela, taka fronteira sira hotu, no impoin restrisaun oras neen nian hahú hosi tuku 9 kalan oras lokál (2100GMT).
Xefe sira hosi misaun observadór eleitorál sira husu ba Uniaun Afrikana no CEDEAO atu foti pasu nesesáriu sira hodi restaura orden konstitusionál iha nasaun afrikanu osidentál.
Golpe ne’e hala’o bainhira kandidatu independente Fernando Dias no Prezidente Embalo nia kampu sira reklama vitória iha Segunda-feira iha eleisaun prezidensiál, enkuantu nasaun hein hela rezultadu ofisiál sira.
Altu Komandu Militár ba Restaurasaun Seguransa Nasionál no Orden Públika nomeia Jenerál Horta Inta-A nu’udar prezidente tranzitóriu Guiné-Bissau nian iha loron-kinta ne’e.
Notísia relevante: Altu Komandu Militár Giné-Bissau fó pose ba Majór Jenerál Horta nu’udar Prezidente Tranzitóriu
Fonte: Anadolu (Ajénsia Notisioza Túrkia)
