Setór saúde nafatin enfrenta problema menus ai-moruk no profisionál saúde
DILI, 28 Novembru 2025 (TATOLI)—Timor-Leste, sesta ne’e, komemora loron proklamasaun independénsia RDTL ba da-50 maibé Timor-Leste sei nafatin enfrenta problema iha setór saúde liuliu menus ai-moruk no mós menus profisionál saúde atu atende pasiente sira iha ospitál, postu no sentru saúde sira iha territóriu.
“Ita selebra loron proklamasaun da independénsia ba da-50 iha ita-nia rain, maibé ha’u sei sente triste tanba saúde nafatin enfrenta problema sira hanesan atendementu ladun diak ba ha’u-nia familia sira-ne’ebé mak moras bainhira ba iha ospitál la salva,” Komunidade baibain, Cecilia Gomes Soares, hateten ba Agência Tatoli hafoin partisipa komemorasaun loron proklamasaun independénsia ba da-50 iha Palásiu Governu, ohin.
Nia haktuir, medikamentu sira nafatin sai probelma iha fasilidade saúde dalaruma médiku sira detekta tiha moras pasiente nian, maibé atu ba simu ai-moruk mós ai-moruk laiha entaun ida-ne’e sai nafatin problema ba iha sosiedade Timor Leste.
“Ha’u hakarak husu ba Governu liuliu Ministériu Saúde atu hadi’a di’ak liután saúde ida-ne’e no ha’u sujere ba Governu katak sira-ne’ebé mak servisu iha ospitál labele servisu haree ba partidu, maibé tenke servisu ho profisionál atende ema ho di’ak ho laran no ho domin,” nia dehan.
Deputada Bankada FRETILIN, Nurima Ribeiro Alkatiri, hateten ohin selebra loron proklamasaun da independénsia ba da-50 ne’ebé haree ba iha setor saúde katak saúde nafatin sei hasoru problema.
“Setor saúde nafatin iha problema boot tanba orsamentu ne’ebé mak prevee kada tinan ba Ministériu Saúde ho orsamentu boot, maibé jestaun ba setor saúde mak sai prolemátiku liután, tanba la konsege fó atendementu báziku ba ita-nia sidadaun sira. Ida-ne’e, ha’u sente ita nunka hasoru depois tinan 50 ita independénsia,” nia dehan.
Nia rekomenda ba Governu tenke tau jestor saúde ne’e tau ema ne’ebé mak hatene jestaun, nune’e jere ho sentidu Estadu, tenke jere hanoin ba povu tanba ne’e saúde no edukasaun presiza urjente atu halo hanoin ho progresista ho hanoin dezenvolvimentu nasaun no dezenvolvimentu povu nian.
Jornalista : Felicidade Ximenes
Editór : Cancio Ximenes
