DILI, 28 Novembru 2025 (TATOL)–Antigu Reitór Universidade Nasionál Timor Lorosa’e (UNTL), Francisco Miguel Martins esplika kuandu taka Diresaun Inspessun no Auditoria UNTL ne’e signifika hamate funsionamentu prosesu dezenvolvimentu UNTL nian.
“Órgaun instituisaun nian ita labele taka. Órgaun instituisaun nian atu funsiona para prosesu dezenvolvimentu ne’e la’o di’ak. Kuandu órgaun instituisaun ita taka signifika ita atu hamate dezenvolvimentu, hamate prosesu re-dignifikasaun implementasaun kontrolu kualidade no utilizasaun orsamentu Estadu ne’ebé aloka ba universidade iha tendénsia ba mál gastu,” nia dehan ba jornalista sira iha resintu Palásiu Governu, Dili, Sesta ne’e, relasiona ho estrutura UNTL deside taka Diresaun Inspesaun no Auditoria UNTL.
Profesór Doutór ne’e hatutan prosesu taka Auditoria UNTL ne’e loloos labele akontese iha instituisaun públiku hanesan universidade públika, tanba ema presiza hatene lala’ok no ezekusaun sira UNTL nian.
Notísia relevante: Reitór UNTL: Taka Diresaun Inspesaun no Auditória tanba la inklui iha estatutu foun UNTL
“Ha’u lahatene tanbasá mak taka maibé iha ha’u-nia mandatu ha’u mak institusionaliza Auditória Interna iha UNTL, atu hadi’a sistema implementasaun orsamentu,” Francisco haktuir.
Antigu Reitór UNTL subliña instituisaun ida ka órgaun ida iha para kuida iha implementasaun orsamentu Estadu ho loloos no ezisténsia Auditoria Interna atu hadi’a la’ós atu kondena.
“Se Auditoria Interna laiha ita la kurize ita-nia implementasaun orsamentu, orsamentu ho loloos no didi’ak tuir nórma no prosedimentu ne’ebé trasa ona husi Estadu,” nia akresenta.
Francisco esplika, iha estatutu foun UNTL, iha-ne’ebá Auditoria Interna nafatin eziste, maski iha artigu balun dehan Unidade Fiskál Úniku, ne’ebé husi finansa mak kontrola.
Jornalista: Osória Marques
Editór: Xisto Freitas da Piedade
