DILI, 17 Novembru 2025 (TATOLI)—Reitór Universidade Nasionál Timor Lorosa’e (UNTL), João Soares Martins informa nia parte taka Diresaun Inspesaun no Auditória tanba la inklui iha estatutu foun universidade nian.
“Ha’u taka Diresaun Inspesaun no Auditória tanba estututu foun la prevee iha-ne’ebá. Enkuantu, estatutu foun Servisu Auditóriu sei kompete ba kompetisaun Fiskál Úniku, ne’ebé ami husu ona Ministériu Ensinu Superiór Siénsia no Kultura (MESSK) atu nomea entidade ida mai atu sai Fiskál Úniku iha UNTL,” nia relata ba jornalista sira iha Jináziu Dili, Segunda ne’e.
Tanba ne’e, nia konsidera atu keixa reitór hanesan atu indisiplinár, nune’e nia parte sei foti prosesu indisiplinár hasoru ema ne’ebe halo keixa.
“Ha’u hanoin kestaun keixa reitór, ida-ne’e ha’u konsidera hanesan atu indisiplinár. Ita sei foti prosesu disiplinár hasoru sira-ne’ebé keixa reitór,” nia realsa.
João Martins subliña, taka diresaun la’ós foin akontese iha UNTL, maibé Governu rasik mós foti desizaun taka empreza públika no instituisaun públika, entaun ida-ne’e normál.
Nia dehan, kona-ba funsionáriu sira-ne’ebé servisu iha Diresaun Auditória, provizoriamente parte UNTL destaka sira bá Diresaun Rekursu Umanu.
“Kona-ba funsionariu sira-ne’e, provizoriamente ita destaka hotu sira bá Diresaun Rekursu Umanu, depoiz ita sei haree hodi koloka sira tuir sira-nia abilidade no sira-nia área. Ita labele tau ema arbiru,” nia afirma.
Entretantu, Ministériu Ensinu Superiór, Siénsia no Kultura, José Honório, husu Pro-Reitór Auditóriu UNTL, atu lee filafali estatutu foun ne’ebé Governu rasik aprova ona tanba iha estatutu foun ne’ebé Governu aprova no Prezidente Repúblika promulga, iha-ne’ebá Diresaun Auditoria la eziste ona, iha mak pakote Fiskál Úniku ne’ebé ministériu mak sei nomea ema ida atu haree asuntu ne’e.
Tuir Ministru katak taka diresaun ida la’ós abuzu podér, maibé tuir estatutu ne’ebé iha. Tanba ne’e, hanesan funsionáriu públiku se la kontente ho desizaun ruma hato’o keixa ba Komisaun Funsaun Públika (CFP-sigla portugeza), la’ós keixa fali reitór ba Polísia Nasionál Timor-Leste (PNTL).
José Honório husu atu labele lori problema Universidade nian ba li’ur, maibé tenke entrega ba reitór atu bolu diresaun ne’ebé mak halo sala.
“Sira la’ós auditóriu esterna maibé sira auditóriu interna, katak problema saida mak sira hetan iha kada diresaun, sira tenke hato’o ba reitór atu reitór bolu ema sira-ne’e atu rezolve, la’ós lori sai fali bá li’ur,” nia akresenta.
Kona-ba nomeasaun ba Fiskál Úniku, nia dehan, Ministériu sei hili ema independente, la’ós husi UNTL.
“Fiskál Úniku ita tenke hili ema indepedente ida atu haree no halo fiskalizasaun ba servisu tomak UNTL nian. Tanba ne’e, ita-boot sira akompaña nia prosesu,” governante ne’e konklui.
Jornalista: Osória Marques
Editór: Xisto Freitas da Piedade
