Orsamentu sosa viatura foun ba deputadu sira fila ba kofre Estadu
DILI, 04 Dezembru 2025 (TATOLI)-Prezidente Parlamentu Nasionál, Maria Fernanda Lay, hateten orsamentu ne’ebé prvee ba sosa viatura iha tinan 2025 ba fila ona ba kofre Estadu, tanba prosesu ne’e kanseladu.
“Fim do ano fila ba kofre Estadu”, Fernanda Lay dehan iha edifísiu Ministériu Finansa, Aitarak-Laran.
Lembra katak Parlamentu Nasionál aloka millaun $4,2 iha Orsamentu Jerál Estadu (OJE) 2025 atu sosa veíkulu foun unidade 65, hodi fasilita mobilidade no serbisu deputadu sira iha lejislatura daneen.
Maibé, hafoin mosu ezijénsia husi Estudante Universitáriu Timor-Leste (EUTL) nian mak Parlamentu deside ho halo kanselamentu ba akizisaun karreta.
Iha 16 Setembru 2025, Parlamentu liuhusi reuniaun plenária aprova ho unanimidade rezolusaun kanselamentu ba prosesu sosa karreta foun unidade 65 ho votu a favór 57, kontra no abstensaun 0.
Proposta rezolusaun ne’e aprezenta husi bankada parlamentár CNRT, PD no KHUNTO.
Notísia relevante: https://tatoli.tl/2025/09/16/parlamentu-aprova-ho-unanimidade-rezolusaun-ba-kanselamentu-sosa-viatura-foun/
Jornalista: Nelson de Sousa
Editora: Maria Auxiliadora
