DILI, 04 Dezembru 2025 (TATOLI)—Sekretáriu Estadu Formasaun Profisionál no Empregu (SEFOPE), Rogério Araújo Mendonça, informa hahú husi fulan-Janeiru 2026 sira sei koordena ho FALINTIL Defeza Timor-Leste (F-FDTL) liuhusi Navál no Polísia Nasionál Timor-Leste (PNTL) iha Unidade Polísia Máritima, atu fasilita formasaun iha área peska liuliu nani ba traballadór timoroan sira molok ba servisu iha Korea.
“Ha’u hanoin, ita haree iha tinan 2025 liuliu iha Korea mosu traballadór lakon vida iha área peska, maibé iha parte seluk mos ami rekoñese katak durante ne’e hahú husi 2023 hodi mai to’o agora ne’e (2025) ita laiha formasaun ida ba iha área tasi nian antes traballadór sira ba servisu,” Sekretáriu Estadu ne’e informa ba jornalista sira iha MNEK, ohin.
Tanba ne’e, Sekretáriu Estadu dehan iha tinan 2026 iha fulan-Janeiru, SEFOPE mós sei ba hasoru Forsa Navál no Polísia Marítima nian atu servisu hamutuk ho hodi fó formasuan ba traballadór sira iha área peska nian.
Governu la realiza formasaun ne’e hahú husi 2023, maibé antes ne’e husi tinan lima ka neen ba kotuk, Governu Timor-Leste liuhusi SEFOPE ho HRD Korea liuliu iha área peska fó ona formasaun ba kandidatu sira antes ba servisu iha Korea. maibé tamba de’it iha momentu ne’ebá iha iraballadór ida mak hetan asidente ka mate bainhira tuir treinu nani no família sira hakarak SEFOPE responsabiliza.
“Ho razaun ida-ne’e mak entaun líder no kargu xefia sira hanoin se loke nafatin formasaun ida-ne’e mak asidente nafatin akontese ema mai fó sala ba pesoál ida la’ós instituisaun. Tanba ne’e mak momentu ne’ebá ami hapara tiha formasaun área tasi nian, nia dehan.
Enkuantu, solusaun sira-ne’e la permite nafatin ba asidente ne’ebé kontinua akontese iha Korea hanesan foin lalais ne’e traballadór mout iha tasi no laiha salvasaun.
“Ida-ne’e atu hatete hanesan iha parte Ermera no Aileu laiha tasi no munisipiu seluk iha tasi entaun ita hare’e ba sira-ne’ebá laiha esperiénsia no laiha koñesimentu ba tasi nian, ita servisu hamutuk ho parte naval sira hodi fó formasaun ba kandidatu ne’ebé liu ona selesaun,” nia hateten.
Maske iha ema barak dehan ne’e responsabilidade SEFOPE nian, loos duni ida-ne’e Governu mak haruka maibé dezastre no destinu ne’e la espera tanba ema bele mate iha situasaun saida de’it dalaruma tuur ka hamriik de’it mós bele mate.
Esforsu husi SEFOPE nian mak adidu ho asistente adidu ba hasoru ona empreza no autoridade seguransa polísia no Maritima sira balun uza aviaun no ró hodi buka traballadór nia mate-isin.
“Agora sira estende tan semana ida loron rua hodi buka nafatin. Ida-ne’e esforsu ita-nian maibé mídia dehan SEFOPE laiha responsabilidade ne’e hanesan ema ida ka rua de’it ne’ebé mak la gosta SEFOPE mak pronúnsia nune’e. Maibé, adidu, asistente adidu no embaixadór esforsu maka’as tebes atu nune’e bele hetan. Aleinde ne’e parte família mós tenke halo kultura hodi bele hetan solusaun ba ida-ne’e,” nia dehan.
Jornalista : Alexandra da Costa
Editór : Cancio Ximenes
