SNAEM planeia sei sosa tan karreta ambulánsia iha 2026
DILI, 04 Dezembru 2025 (TATOLI)—Servisu Nasionál Ambulánsia Emerjénsia no Médikamentu, Institutu Públiku (SNAEM, I.P), tuir planu, sei sosa tan karreta ambulánsia haat (4) ne’ebé kompostu husi karreta operasional ida (1), ambulánsia rua (2) no ambulánsia ba ema ho difisiénsia ida (1) iha 2026.
” Ita nafatin iha planu atu kompras ambulánsia tolu (30 mós karreta operasionál ida (1), agora karreta operasionál ne’e ita kompras ho objetivu karik ambulánsia aat iha dalan. Ezemplu, husi Lospalos mak iha ospitál rejionál mak aat, entaun SNAEM iha kapasidade haruka karreta husi ne’ebé atu bele tula mai halo manutensaun. Ita mós iha planu atu sosa ambulánsia ba ita-nia maluk Ema ho Defisiénsia sira,” Diretór Servisu Nasionál Ambulánsia Emerjénsia no Médikamentu, Simplicio Amaral, hateten ba jornalista sira, iha Kaikoli, ohin.
Nia dehan, planu ne’e hola parte husi Governu Konstitusionál da-sia (IX) nian liuliu Primeiru Ministru no Mós Ministra Saúde fó atensaun másimu ba ema ho defisiénsia sira.
“Ho nune’e mak ita bele iha balansu. Ita mós iha planu atu kompras karreta ambulánsia ba ema defisiénsia sira, maibé nia modelu la hanesan. Ita hein de’it, iha prosesu halo proposta ba Ministra Saúde, karik aprova ita bele kompras hodi bele atende ba ita-nia maluk ema ho defisiénsia sira,” nia dehan.
Nia haktuir, orsamentu ne’ebé mak aprova hamutuk rihun $500, mais husi rihun $500 ne’e lá’os atu sosa de’it ambulánsia maibé sosa mós ekipamentu médiku ho item seluk.
“Ne’ebé, rihun $300 ita aloka ba sosá transporte saúde nian hanesan ambulánsia sira,” nia hateten.
Totál ambulánsia ne’ebé mak daudaun ne’e iha hamutuk 39 ne’e funsiona hotu, no uluk relata aat sira-ne’e entrega hotu ona ba patrimóniu Estadu hamutuk 29 tanba antes ne’e ambulánsia totál hamutuk 53.
“Ambulánsia 39 ne’e ne’e di’ak hotu husi Dili to’o Munisípiu inklui RAEOA no Ataúru. Kada Munisípiu ambulansia iha rua maibé horisehik iha Ermera mak tolu ami retira tiha ida, tanba munisípiu balun iha ida. Tanba neé, ita presiza distribui tan ba iha munisípiu sira seluk,” nia dehan.
Jornalista : Felicidade Ximenes
Editór : Cancio Ximenes
