DILI, 04 Dezembru 2025 (TATOLI)–Tribunál Judisiál Primeira Instánsia Dili (TJPID), Kinta ne’e, liuhusi despaisu ba prosesu Primeiru Interrogatóriu deside aplika pena Prizaun Preventiva ba arguidu ho inisiál RLdCG tanba foti subar telefone iha Jaco Store Fatuhada, foin lalais ne’e.
Iha prosesu interrogatóriu dahuluk ne’e, Ministériu Públiku (MP) promove arguidu mai Tribunál ho krime Furtu Agravadu previstu iha artigu 252 husi kódigu penál Timor-Leste.
Iha alegasaun, MP reprezenta Prokuradór Adérito Tilman husu ba Tribunál atu aplika pena Prizaun Preventiva ba arguidu tanba nia rasik konfesa ba faktus hotu ba Tribunál katak, momentu ne’ebá arguidu sira iha duni planu hodi foti telefone iha Jaco Store.
Notísia relevante : Tribunál aplika medida Aprezentasaun Períodika ba NdSP no JA suspeitadu kazu foti subar telefone
Parte Arguidu RLdCG nia Defeza, Defensór Públiku João Carvalho hateten, iha nia alegasaun husu Tribunál aplika medida koasaun aprezentasaun períodika ba arguidu.
Hafoin Tribunál rona tiha, parte hotu Juíz turnu José Maria de Araújo iha nia despaisu, deside aplika pena Prizaun Preventiva.
Rekorda fali katak, Arguidu RLdCG antes ne’e halai sees husi prosesu, tanba ne’e Tribunál hasai mandadu detensaun no Polísia ezekuta hodi kaptura RLdCG iha Sesta (28/11) hodi halo detensaun iha oras 72 molok aprezenta ba Tribunál.
Prosesu interrogatóriu dahuluk ne’e prezide husi juiz turnu José Maria de Araújo, MP reprezenta husi Prokuradór Adérito Tilman, arguidu hetan asisténsia legál husi Defensór Públiku João Carvalho.
Jornalista : Natalino Costa
Editora : Julia Chatarina
