Fulan-Dezembru, promosaun ba juíz hala’o knaar iha Supremu Tribunál Justisa
DILI, 05 Dezembru 2025 (TATOLI)–Prezidente Tribunál Rekursu, Afonso Carmona informa, promosaun ba juíz sira ne’ebé atu haha’o knaar iha Supremu Tribunál Justisa sei hala’o iha Fulan-Dezembru tinan ne’e.
Inspetór husi Tribunál Rekursu daudaun ne’e halo ona serbisu inspesaun ba juíz sira iha Tribunál Rekursu tantu ba juíz sira ne’ebé halo serbisu iha Tribunál Judisiál Primeira Instánsia Dili (TJPID), nune’e besik konklui ona.
“Hahú 01 Dezembru ne’e promosaun ba juíz sira. Agora inspetór halo ona nia serbisu inspesaun ba juíz sira-nia serbisu. Nia seidauk fó rezultadu mai ita atu lori bá Konsellu hodi diskute,” Carmona hato’o ba Jornalista sira iha TJPID, Kaikoli, Sesta ne’e.
Prezidente Tribunál Rekursu dehan, tuir Lei Organizasaun Judisiária, juíz sira ne’ebé atu tuur iha Supremu Tribunál Justisa ne’e iha juíz konselleiru na’in-hitu, ne’ebé na’in-haat husi majistradu judisiáriu, enkuantu na’in-tolu seluk ida husi Parlamentu no ida husi Prezidénsia Repúblika inklui na’in-ida nu’udar ema profisionál ne’ebé iha koñesimentu iha área judisiál.
Notísia relevante : OJE 2026: TR prioriza instalasaun Supremu Tribunál Justisa
Nia esplika, enkuantu ba juíz sira ne’ebé tuur iha Tribunál segunda instánsia ka Tribunál Rekursu ne’e iha juíz na’in-sia.
“Promosaun ida-ne’e ita prepara hela ema ne’ebé tuur iha Supremu Tribunál Justisa tanba tuir kalendáriu katak instalasaun Supremu Tribunál tenke konklui ona iha 20 Maiu tinan oin. Entaun hahú prepara hela rekursu husi Tribunál,” nia katak.
Nia hatutan: “Tempu Supremu Tribunál Timor-Leste tenke instala ona, nune’e bele fó atendimentu justisa ne’ebé justu ba povu.”
Jornalista : Natalino Costa
Editora : Julia Chatarina
