DILI, 05 Dezembru 2025 (TATOLI)—Komemora Loron 16 Ativizmu Kontra Violénsia Bazeia ba Jéneru (VBJ) no Loron Direitu Umanu, Konfederasaun Sindikatu Timor-Leste (KSTL) organiza atividade street compaign kona-ba konvensaun 190 ba traballadór no komunidade.
Objetivu husi atividade ne’e atu fahe informasaun kona-ba konvensaun 190 kona-ba halakon violénsia no asédiu sexuál iha mundu traballu. Tanba dala barak traballadór barak mak ta’uk lakon servisu hodi hato’o keixa ba parte relevante.
“Ami sensibiliza informasaun kona-ba kampaña loron 16 ba maluk traballadór no komunidade kona-ba hapara violénsia no asédiu sexuál iha servisu fatin. Nune’e mós ita-nia konvensaun 190 ne’e ba sira,” Portavóz KSTL, Etelvina Sarmento hateten ba jornalista sira iha Palásiu Governu, Sesta ne’e.
Notísia relevante: SEI selebra Loron 16 Ativizmu Kontra Violénsia Bazeia ba Jéneru
Nia dehan sensibilizasaun ne’e KSTL to’o ona bá área remota no sira-nia parte ne’ebé seidauk tama mak Munisípiu Baukau no Bobonaru.
“Ita-nia atividade sensibilizasaun ne’e ba instituisaun públika inklui setór privadu sira-ne’ebé traballadór servisu ba. Tanba iha servisu fatin mak akontese violénsia no asédiu sexuál barak liu. Durante ne’e ami simu kazu lima no kazu ne’e rasik ami sei prosesa hela. Nune’e, ami husu Governu atu ratifika hodi prevene violénsia no asédiu sexuál iha servisu fatin,” Etelvina informa.
Nia hatutan prosesu ba kazu sira hanesan ne’e KSTL lori ba prosesu legál sira.
Atividade loron 16 kampaña ativizmu ne’e hala’o durante loron tolu (3) hahú ohin (Sesta, 05/12/2025), sei kontinua iha Segunda-Tersa, semana oin.
Jornalista: Osória Marques
Editór: Xisto Freitas da Piedade
