BOBONARU, 05 Dezembru 2025 (TATOLI) – Autoridade Munisípiu Bobonaru tau ona prioridade atu implementa, iha tinan oin, projetu lima iha Planu Dezenvolvimentu Integradu Munisipál (PDIM).
Projetu sira ne’e mak konstrusaun ba Postu Saúde Lontas ho valór orsamentu rihun $78; reabilitasaun sistema bee-moos iha aldeia Dilai, Silagoli, no Anon iha suku Lupal no Guda ho ho valór $180; konstrusaun sala tolu iha EBF Ozo, suku Lontas ho valór $72; reabilitasaun ba kanalizasaun bee-moos iha aldeia Oceli ho valór $60; no konstrusaun merkadu iha postu administrativu Lolotoe ho valór $150.
Felicidade de Jesus Afonso, komunidade Lolotoe hateten desizaun Governu atu implementa projetu lima ne’e fó ona esperansa ba komunidade hodi sente dezenvolvimentu.
Notísia relevante: Bobonaru prevee millaun $2,7 iha PDIM hodi implementa projetu 22 iha tinan oin
“Ami kontente katak tinan oin ami-nia postu sei simu projetu lima. Ida-ne’e karik la rezolve problema hotu, maibé pelu menus bele rezolve preokupasaun balun”, nia dehan ba Tatoli iha Maliana, ohin.
Kona-ba projetu konstrusaun merkadu Lolotoe, nia konsidera ne’e importante atu hasa’e atividade ekonómika komunidade lokál nia. “Karik harii duni, vendedór sira bele fa’an sira-nia sasán iha fatin ne’ebé apropriadu”, nia akresenta.
Abitante António Belo mós hato’o hanoin ne’ebé hanesan, katak tinan oin sei sai momentu importante, tanba Lolotoe ladún hetan pakote dezenvolvimentu iha tinan sira liubá.
“Tinan oin ami sei simu projetu lima. Iha tinan sira liubá, ami hetan de’it ida ka rua, dalaruma laiha ida. Projetu sira ne’e aborda ami-nia preokupasaun sira, liuliu kona-ba instalasaun sira bee no saúde nian”, nia hateten.
Nia hatutan katak insfraestrutura bázika hanesan estrada, bee-moos, kuidadu saúde, no eletrisidade sai nafatin prioridade ba rezidente sira, tanba haree ba Lolotoe nu’udar área rurál ho infraestrutura minima.
“Ami espera katak tinan sira mai ne’e hetan barak liután, tanba Lolotoe sei presiza infraestrutura bázika”, nia realsa.
Notísia relevante: Konkursu públiku ba projetu PDIM 2026 iha Bobonaru tenke imparsiál
Jornalista: Sergio da Cruz
Editora: Maria Auxiliadora
