DILI, 03 Dezembru 2020 (TATOLI)—Estudante husi Departamentu Polítika Públika, Fakuldade Siénsia Sosiál, Universidade Nasionál Timor Lorosa’e (UNTL), husu Reitór João Soares Martins atu anula despaxu nú. 52,53/UNTL/R/XI/2025 hodi taka Diresaun Nasionál Inspesaun no Auditoria UNTL.
Portavóz estudante Departamentu Polítika Públika, José Alexandre Gama deklara sira lamenta ho Reitór UNTL ne’ebé uza podér hodi taka Diresaun Inspesaun Nasionál Auditoria hodi fó biban ba sira atubele fahe osan Estadu ba-malu.
“Ami alumni no estudante ativu sira husi UNTL, lamenta ho desizaun ne’ebé halo husi Reitór João Soares Martins ho nia aliadu sira-neʼebé uza podér hodi taka Diresaun Inspesaun Nasionál Auditoria no Kontrol Kualidade atu sira bele pratika korupsaun ka fahe osan ba-malu ho modu oioin,” nia dehan liuhusi konferénsia ba imprensa iha kampus UNTL, Kaikoli, Kuarta ne’e.
Notísia relevante: Taka Diresaun Inspesaun no Auditoria UNTL hamate prosesu re-dignifikasaun implementasaun kontrolu kualidade
Portavós dehan estudante konsidera durante reitór nia mandatu hamosu irregularidade barak ne’ebé reflete iha avaliasaun programátiku husi Ajénsia Nasionál ba Avaliasaun no Akreditasaun Akadémika (ANAAA) iha fakuldade sira maiória hetan valór C no mós tuir relatóriu auditóriu interna iha 2024, pursentu 95 (95%) potensia fraude iha administrasaun finansa.
Iha fatin hanesan, estudante Ason Maubere, informa instituisaun Estadu presiza iha Diresaun Inspesaun Nasionál Auditoria no Kontrolu Kualidade hodi halo kontrolu ba prosesu orsamentu sira-ne’ebé utilizadu.
“Bainhira taka auditoria mak ita konsidera sei iha tendénsia atu hamosu pratika korupsaun iha UNTL, tanba ita hatene katak instituisaun Estadu presiza kontrolu másimu atubele garante nia kualidade tuir vizaun UNTL nian katak tenke sai sentru eselénsia ba ensinu superiór hotu-hotu,” nia afirma.
Nune’e mós, estudante Franzelino Correia hateten katak despaxu reitór nian hodi taka auditoria, tanba reitór hakarak taka nia erru sira-ne’ebé durante ne’e kometidu.
“Ami konsidera katak despaxu reitór nian taka auditoria, ida-ne’e hatudu katak reitór iha interese atu taka reitór nia erru sira-ne’ebe durante ne’e nia komete,” nia dehan.
Tuir estudante ne’e katak bainhira nomea Fiskál Úniku sei la rezolve problema, maibé sei halakon valór akadémiku UNTL nian.
Jornalista: Osória Marques
Editór: Xisto Freitas da Peidade
