OEKUSI, 10 Dezembru 2025 (TATOLI) – Xefe suku Suni-Ufe Crisanto Tamele ho Xefe Suku Bene-Ufe Marcos Meni, rekomenda ba Autoridade Rejiaun Administrativa Espesiál Oekusi Ambeno (RAEOA) atu koordena ho empreza Telemor, hodi bele rezolve redi telekomunikasaun tanba tinan barak ona komunidade sira labele asesu tantu telefónika no internet.
“Komunidade Suni-Ufe triste, ami preokupa no kestiona ona, tanba saida mak ami-nia suku ne’e labele asesu rede telekomunikasaun? Internet atu telefone mós ladi’ak, ami triste tanba tinan barak ona la’ós foin. Dalaruma inan balun partu, dezatre naturál akontese iha ne’e, atu relata ba parte relevante oinsá, liu-liu pagamentu pensaun idozu dalaruma akontese falla barak, tanba liaha meiu komunikasaun ne’ebé di’ak. Ami husu sei bele koordena ho parte Telemor, tanba iha ne’e maioria uza kartu ne’e, husu sira atu mai rezolve Netik, suku sira seluk hetan só ami Suni-Ufe inklui kolega sira iha Bítila mós hanesan,” Xefe Suku Suni-Ufe Crisanto Tamele, informa, iha Oekusi, ohin.
Tuir nia, bainhira atu kontaktu família ruma ka nesesidade públiku liga komunidade sira, tenke buka fatin husi suku Suni-Ufe tenki bas uku Taiboko sorin mak foin bele asesu.
“To’o Taiboko mós la’ós maioria, maibé parte sorin de’it, ne’ebé ami espera Governu liuhusi Autoridade bele komunika ho Telemor, atu bele hadi’a, tanba ami sofre tinan barak ona,” nia rekomenda.
Notísia relevante: https://tatoli.tl/2023/12/27/mtk-orienta-anc-koordena-ho-operador-telekomunikasaun-hadiak-rede-internet/
Rekomendasaun hanesan mós, Xefe suku Bene-Ufe, Marcos Meni, sujere Autoridade RAEOA atu fó xamada atensaun ba empreza Telemor, tanba populasaun iha suku Bene-Ufe maioria uza kartaun Telemor.
“Ami besik fronteira depois dook husi Oekusi. Iha ne’e, iha instituisaun Estadu barak, hanesan saúde, Alfándega, UPF no seluktan, maibé ami-nia problema mak jaringan (rede) de’it, uluk eleisaun Parlamentu mosu problema atu kontaktu ba nasionál no rejionál ladi’ak. Ha’u hanoin ne’e problema simples, sira (empreza Telemor) bele rezolve, tanba ami mak sosa pulsa no telefone, tinan barak ona dezde ukun an to’o agora mós seidauk bele hadi’a. Ami husu Autoridade presiza koordena ho sira, tanba saida mak seidauk bele hadi’a, se bele fó karta xamada atensaun, tanba saida mak suku seluk sira asesu di’ak hela, ami iha fronteira ladi’ak fali, ida-ne’e tenke husu empreza tenke tau matan,” nia hateten.
Notísia relevante: https://tatoli.tl/2025/09/06/autoridade-lokal-beko-solisita-operador-telekomunikasaun-rezolve-rede-internet/
Hatan ba rekomendasaun sira-ne’e, Prezidente Autoridade RAEOA, Régio da Cruz Salu, rekoñese, no promete sei enkamiña rekomendasaun sira-ne’e ba parte empreza Telemor atu konsidera.
“Iha fulan kotuk ha’u vizita ona Bítila suku Bene-Ufe, iha ne’ebá komunidade sira preokupa, ohin iha Suni-Ufe mós hanesan tanba tinan barak liña telekomunikasaun labele asesu iha fatin sira-ne’e. Preokupasaun ne’e ha’u koordena ho dirijente sira husi Telemor maibé to’o agora seidauk rezolve, hanesan Autoridade ita sei komunika nafatin, tanba ne’e nesesidade públiku. Ita sei husu sira, tanba ne’e mós parte negósiu ona, entaun sira tenke responde no konsidera tanba suku rua sira labele asesu tinan barak ona,” nia hateten.
Notísia relevante: https://tatoli.tl/2025/06/29/reforsa-kapasidade-telemor-lansa-servisu-komersial-5g/
Jornalista: Abílio Elo Nini
Editór: Rafael Ximenes de A. Belo
