OEKUSI, 10 Dezembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, fó-sai katak, to’o 31 Dezembru 2025, Autoridade laiha intensaun atu extende funsionáriu termu-sertu sira iha Oekusi tanba laiha nesesáriu serbisu inklui Orsamentu Jerál Estadu (OJE) 2026 nian mós iha redusaun ba saláriu no vensimentu.
“Komesa husi semana ne’e, presiza informa ba funsionáriu termu-sertu deznesesáriu, la presiza atu kontinua tanba ita konsiente ho razaun prinsipál rua; primeiru, tanba ita kontinua reorganiza, re-estrutura no reajustu prestasaun serbisu Autoridade nian, nune’e kle’ur ka lais, 40% serbisu administrasaun públiku mak iha urbana restante ba iha terrenu, entaun funsionáriu termu-sertu sira, komesa semana ida-ne’e, ita sei hasai karta informativa ida ba sira katak, depois loron 31 Dezembru 2025, Autoridade laiha intensaun atu kontinua extende kontratu,” Régio Salu iha Oekusi dehan, ohin.
Notísia relevante:PDHJ deteta funsionáriu barak iha Oekusi dezobidiente ba enkuadramentu legál
Nia esplika, funsionáriu termu-sertu ne’ebé sei simu karta informativa tanba haree ba serbisu la nesesáriu, tanba serbisu estruturál Autoridade RAEOA bele halo, razaun ne’e atu reajusta nível saláriu tabela funsaun públika nian.
Razaun daruak, presiza konsiénte katak iha 2026 Orsamentu Jerál Estadu (OJE) iha redusaun ba saláriu no vensimentu, la’ós dezafiu maibé nu’udar teste ida ba Autoridade RAEOA, ho rekursu naton maibé bele prodús rezultadu ne’ebé iha progresu di’ak.
“Tantu, ne’e prosesu normál iha serbisu administrasaun ba jestaun rekursu umanu, iha tempu ida tenke redus no tempu ida tenke reajusta, no tempu ida tenke rekoloka, maibé orsamentu barakliu tenke tuun setór nesesáriu sira ba povu, nune’e mós ita foku ba zona ekonomia espesiál, ida-ne’e maki ta-nia kompromisu,” nia hateten.
Ezekutivu ne’e, la esplika detallu kona-ba totál númeru funsionáriu termu-sertu sira iha Oekusi.
“Númeru ha’u labele fó sai, maibé ita sei haree karta hira mak sei fó sai ba termu-sertu sira, serteza sei hahú husi Gabinete Prezidente Autoridade, tenke reajusta inklui diresaun sira hotu,” nia informa.
Entretantu, OGE 2026 ba RAEOA hamutuk 22,788,994.00. Husi montante ne’e, alokasaun ba Saláriu no Vensimentu hamutuk 8,211,073.00 (36%).
Notísia relevante:PDHJ Oekusi rejista keixa sia ho indikasaun forte iha violasaun rua
Jornalista: Abílio Elo Nini
Editór: Rafael Ximenes de A. Belo
