ÐILI, 10 Dezembru 2025 (TATOLI)—Governu liuhusi Ministru Justisa, Sergio Hornai garante katak Supremu Tribunál Justisa sei instala iha tinan 2026.
“Ita tenke iha konfiansa, ita tenke iha esperansa. Se ita laiha esperansa ita labele la’o ba oin. Pelu menuz ita iha ona ideia para estabelese Tribunál Supremu,” Sergio Hornai hateten ba Jornalita sira, iha Palásiu Governu, Kuarta ne’e.
Nia dehan, parte responsável sira sei instala uluk komisaun ba rekrutamentu juíz sira no edifísiu ba Supremu Tribunál.
“Servisu la’o daudaun ona, bainhira maka ita atu konklui atubele instala Tribunal Supremu,” nia akresenta.
Notísia relevante : Fulan-Dezembru, promosaun ba juíz hala’o knaar iha Supremu Tribunál Justisa
Husi Governu nia apoiu ba polítika lejizlasaun nomós lojístika atu nune’e prosesu ne’e bele la’o.
Governante ne’e dehan, Komisaun ne’e kompostu husi ema sira ne’ebé iha méritu no hetan eskolla husi Parlamentu no Prezidente Repúblika, ne’ebé sei prezide komisaun ne’e hodi halo serbisu ho independente tuir Lei Organizasaun Judisiária artigu 7, ne’ebé ko’alia kona-ba Komisaun Rekrutamentu ba Juíz Supremu Tribunál Justisa.
“Komisaun ne’e rua, husi Parlamentu Nasionál, depois ida husi Prezidente Repúblika. Sekretariadu orsida sira rasik mak tenke estabelese,” nia esplika.
Jornalista : Natalino Costa
Editora : Julia Chatarina
