DILI, 10 Dezembru 2025 (TATOLI)–Prezidente Institutu Nasionál Formasaun Dosente no Profisionál Edukasaun (INFORDEPE), Domingos Martins klarifika subsídiu (perdiem) ne’ebé apoiu ba profesór Bolsa Kandidatu Ensinu Sekundáriu hodi tuir formasaun preparatóriu iha Maliana.
“Perdiem $80 ba loron dahuluk iha Postu Administrativu Maliana, Munisípiu Bobonaru hodi enfrenta formasaun preparatória. Juridikamente ami halo formasaun ne’e ho baze legál, katak ema ne’ebé seidauk simu toma pose no seidauk iha vinkulu ida iha Komisaun Funsaun Públika, signifika katak nia seidauk bele simu movimentu pesoál. Mezmu nune’e, ami transfere ona orsamentu uitoan ba Institutu São João de Brito. Sira iha sentidu umanitáriu uitoan mak fó $80 ne’e,” Prezidente INFORDEPE klarifika ba jornalista sira iha resintu Ministériu Edukasaun (ME), Vila-Verde, Dili, Kuarta ne’e, relasiona ho bolsa kandidatu sira-nia preokupasaun kona-ba perdiem kada loron $40 durante tuir formasaun loron neen iha terrenu.
Notísia relevante: ME hahú xamada submisaun dokumentu ba Bolsa Kandidatu Ensinu Sekundáriu
Responsavel dehan, husi $80 iha loron dahuluk atu apoiu sira maihusi munisípiu hodi verifika dokumentu, nune’e INFORDEPE prepara transporte hodi transporta manorin sira-ne’e ba Maliana.
Domingos esplika formasaun referida utiliza orsamentu transferénsia públika, ne’ebé transfere ba Institutu São João de Brito (ISJB) ho montante $96.859,40 tuir item ne’e estabelese iha akordu.
Iha parte seluk, Reitór Institutu São João de Brito, Padre Isaías Abílio Caldas hateten fó formasaun no selu ne’e tuir buat ne’ebé asina ona iha kontratu.
“Selu tuir buat ne’ebé iha asina kontratu ne’e,” Padre Isaías Abílio Caldas hatutan.
Nia haktuir, antes INFORDEPE haruka sira ba Maliana hodi tuir formasaun preparatória, la fó informasaun klara kona-ba orsamentu ne’e.
Entretantu, Bolsa kandidatu Ensinu Sekundáriu, Manuel de Sousa tenik sira simu de’it osan $80. “Ida-ne’e mak ami simu, maibé ba transporte. Han-hemu no toba-fatin ne’e parte edukasaun mak prepara,” nia dehan.
Jornalista: Osória Marques
Editór: Xisto Freitas da Piedade
