DILI, 10 Dezembru 2025 (TATOLI)-Kamboja iha loron-kuarta ne’e formalmente retira hosi Jogu Sudeste Aziátiku ba da-33 ne’ebé realiza iha Tailándia.
Tuir Komité Olímpiku Nasionál Kamboja nian (NOCC), desizaun retira mosu hosi pedidu família atleta sira nian, hodi fó-sai preokupasaun kona-ba seguransa nian.
NOCC, hatete katak movimentu ne’e halo “ho laran-rua hela” no agradese ba Tailándia ba nia ospitalidade.
Kamboja retira ona atleta sira hotu hosi Jogu Sea Games 2025 loron ida hafoin serimónia abertura hosi Jogu Sudeste Aziátiku.
Komité Nasionál Olímpiku Kamboja nian (NOCC) haruka ona karta ofisiál ida ba komisaun organizadora Sea Games nian iha loron-kuarta (10 Fevereiru), la to’o oras 24 hafoin serimónia abertura iha Estádiu Rajamangala.
Kamboja nia razaun hodi retira hosi Sea Games 2025 nian hatete iha karta ida ne’ebé haruka hosi Sekretáriu-Jerál NOCC, S.E. Vath Chamroeun, ba CEO hosi Federasaun Sea Games, Chaiyapak Siriwat.
“Ha’u lamenta atu informa ba ita-boot katak tanba preokupasaun sériu sira no pedidu sira hosi família atleta sira nian atu sira fila lalais ba uma, NOCC tenke retira ami-nia delegasaun tomak no arranja sira-nia fila lalais ba Kamboja tanba razaun seguransa nian.”
“Ida-ne’e la’ós desizaun ida ne’ebé fásil. Ami husu deskulpa ba inkonveniente ruma ne’ebé maka retornu antesipada ne’e bele hamosu no agradese nafatin ba ita-boot nia kompreensaun no apoiu,” nota imprensa husi Kamboja.
Molok desizaun atu hasai atleta hotu-hotu, Kamboja anunsia ona katak sei kansela haruka atleta sira iha desportu lima: futeból, takraw, pencak silat, judo, karate, wushu, no luta.
Iha tempu ne’ebá, Kamboja mós deside atu la haruka atleta sira tanba preokupasaun seguransa no esforsu atu proteje seguransa atleta no ofisiál sira nian.
Kamboja no Tailándia envolve iha konflitu fronteira ne’ebé dura kuaze tinan 20 nia laran.
Iha semestre dahuluk tinan 2025 nian, situasaun sai tensu tanba troka tiru sira.
Situasaun sai aat liután ho atake sira hosi nasaun rua iha loron 24 fulan-Jullu. Iha Segunda-feira (8 Dezembru), akontese tan atake ida, ne’ebé rezulta iha vítima sira no deslokasaun hosi ema sivíl rihun atus-resin.
Notísia relevante: Sekretáriu-Jerál ONU husu Kamboja no Tailándia evita eskalasaun militár iha fronteira
Fonte: PNA/CNN
