KOVALIMA, 10 Dezembru 2025 (TATOLI)– Organizasaun Klibur Dezenvolvimentu Sustentavél Timor-Oan (KDESTO) Kovalima, partilla informasaun kona-ba direitu Ema ho Defisiénsia (EhD) ho termonolojia ba joven-sira iha suku Maudemo, postu Administrativu Tilomar, Munisípu Kovalima.
“Ha’u atu partilla informasaun kona-ba direitu ba ema ho defisiénsia (EhD) ho termonolojia. Molok ita atu tama. Iha presiza hatene uluk lai signifika husi defisiénsia, defisiénsia maka ema ne’ebé iha limitasaun parte iha sira-nia isin lolon”, Reprezentante Diretór KDESTO Kovalima, Melquior Borges aprezenta matéria ne’e, bainhira sai oradór, iha atividade kampaña hakotu violénsia dijitál kontra feto no Labarik Feto sira, iha postu administrativu Tilomar, ohin.
Reprezentante Dirijente KDESTO iha Kovalima ne’e informa katak EhD ne’e fahe ba ho nia tipu haat maka hanesan, ema ho defisiénsia (EhD) fíziku, EhD sensória, Inteletuál ho EhD Psiko-sosiál sira.
KDESTO partilla informasaun kona-ba direitu EhD no uza termonolojia ne’e ba joven-sira bainhira sai oradór, iha atividade kampaña hakotu violénsia dijitál kontra feto no labarik feto, ne’ebé organiza husi Word vision Timor-Leste, tanba realidade hatudu katak sosiedade sira seidauk iha koñesementu kona-ba uza termonolojia ba EhD.
“Foin lalais, ami hala’o atividade atu identifika ema ho defisiénsia iha suku Lalawa bainhira ita husu ema ho defisiénsia ita-nia suku iha ka la’e, maibé komunidade sira hatan dehan laiha. Ita husu dehan iha suku ida-ne’e iha ema ne’ebé mak ain a’at maibé sira hatan dehan barak, ne’e maka sai problema ba ita”, nia dehan.
Termonolojia ne’ebé maka sosiedade sira uza, hodi bolu EhD ladun favoravel ne’e rasik, kontribui mai husi família EhD sira, tanba ko’alia kona-bá asuntu defisiénsia ne’e hanesan asuntu ne’ebé maka global tebes .
“Ita ko’alia kona-ba inkluzivu iha ita-nia servisu fatin tuir orbservasaun dala barak seidauk inkluzivu tanba la inklui ho EhD. Ita hakarak garante objetivu dezenvolvimentu sustentavél (ODS) husi la husik ema ida iha kotuk liuhusi promeve direitu ema ho defisiénsia, maibé fila ba pensamentu husi sosiedade sira oinsá ajuda EhD asesu ba setór hotu”, nia afirma
Realidade hatudu katak dala barak sosiedade-sira uza termonolojia ne’ebé ladun dignu ba EhD, maibé tempu ona uza termu ne’ebé maka dignu ba EhD hanesan labele uza ona termu matan aat, maibé uza termonolojia defisiénsia matan no seluk tan.
Notisia relevante:Governu presiza promove dezenvolvimentu inkluzivu ba EhD iha Timor-Leste
Jornalista:Celestina Teles
Editór: Florencio Miranda Ximenes
