Tailándia lansa operasaun boot hasoru Kamboja, Trump sei halo intervensaun
DILI, 10 Dezembru 2025 (TATOLI) – Mariña Tailándia nian fó-sai iha loron-kuarta ne’e katak lansa ona operasaun ida ho eskala boot ho naran “Trat Prap Porapak“, hodi koloka forsa navál no aérea sira iha área konflitu ho Kamboja.
“Iha loron 10 fulan-Dezembru, Mariña Reál Tailándia nian assume autoridade operasionál ne’ebé luan liu iha nia setór tanba konfrontu militár sira ne’ebé aumenta ho Kamboja,” hatete hosi sede Forsa Defeza Fronteira Tailándia nian, iha provínsia Trat, liuhusi nota imprensa.
Ró funu nian HTMS Thepa koloka ba área operasaun nian no hetan kna’ar atu halo patrullamentu no rekoñesimentu 24 oras, nota imprensa ne’e hateten.
“Tripulasaun tomak hosi ró ne’e koloka ona iha alerta kombate tomak, no arma sira funsiona tomak no prontu atu uza lalais bainhira akontese eskalasaun hosi konflitu,” hatete hosi militár tailandés.
Mariña alerta mós ba peskadór tailandés sira atu labele navega besik fronteira marítima ho Kamboja.
Konfrontu sira iha fronteira Tailándia-Kamboja nian aumenta iha findesemana no kontinua to’o loron-tersa, ho parte rua ne’ebé akuza malu hodi viola sesárfogu.
Iha loron-segunda ne’e, portál notísia Khaosod, sita porta-vós militár tailandés ida, fó- sai katak Kamboja lansa atake aéreu ida hasoru baze militár Anupong, ne’ebé halo Tailándia halo retaliasaun, ho alvu ba infraestrutura militár sira.
Primeiru-ministru Tailándia nian, Anutin Charnvirakul, afirma katak nia governu prontu atu foti medida nesesáriu ruma hodi garante seguransa no soberania nasaun nian.
Konfrontu sira akontese iha fatin sanulu-resin-rua iha sira-nia fronteira ho kilómetru 817 (milla 508) iha funu balun ne’ebé maka’as liu dezde funu loron lima iha fulan-Jullu, ne’ebé Trump hapara ho apelu sira ba líder rua atu hapara sira-nia konflitu aat liu iha istória resente.
Prezidente Estadu Unida Amérika, Donald Trump iha Pennsylvania iha loron-tersa kalan hatete katak sei tenta hapara ostilidade sira.
“Ha’u odiu atu hatete ida-ne’e, ho naran Kamboja-Tailándia, no ida-ne’e hahú ohin, no aban ha’u sei tenke halo xamada ida,” Trump hateten.
“Ha’u sei halo xamada ida no hapara funu entre nasaun rua ne’ebé maka’as tebes, Tailándia no Kamboja.”
Ezérsitu Tailándia nian fó-sai ona ho klaru katak hakarak estraga kapasidade militár sira Kamboja nian no primeiru-ministru Anutin Charnvirakul hatete iha loron-tersa ne’e katak operasaun sei la para.
Hatán kona-ba Trump nia komentáriu sira, nia hatete katak konflitu ne’e hanesan kestaun ida entre nasaun rua ne’ebé envolve.
Portavós Governu Kamboja nian, Pen Bona, hatete katak Phnom Penh nia pozisaun maka hakarak de’it dame no halo ona autodefeza.
Konselleiru prinsipál ida hosi primeiru-ministru Kamboja nian fó ona sinál katak nasaun ne’e prontu atu halo negosiasaun.
Notísia relevante: Kamboja retira husi Jogu Sudeste Aziátiku ne’ebé realiza iha Tailándia
Fonte: Antatanews/Reuters
