DILI, 11 Dezembru 2025 (TATOLI)—Atleta Boxe Timor-Leste na’in-rua hanesan Domingas de Araújo no Grigório de Jesus eleminadu hafoin falla gaña vitória iha kompetisaun desportu SEA Games ne’ebé hala’o iha Chulalongkorn University Sports Center, Bangkok, Kuarta (10/12/2025).
Atleta na’in-rua referidu kompete iha klase diferente hanesan Boxista Domingas de Araújo Barros derrota ho boxista husi Tailándia, Thipsatcha Todwaree, iha klase kilógrama 49 ho skor 2-22.
Enkuantu, Grigório de Jesus derrota ho skor 0-5 bainhira kontra atleta husi nasaun Vietname, Duong Nguyen Van ho kategoria kilógrama 57.
Notísia relevante: Ohin, atleta na’in-tolu husi Timor-Leste kompete iha modalidade Boxe SEA Games
Ho rezultadu referidu, Atleta Domingas Araújo no Grigorio de Jesus eleminadu iha faze oitavu finál ne’ebé tuir regulamentu jogu hala’o liuhusi ronde tolu iha-ne’ebé kada ronde ho durasaun minutu tolu.
Atleta Timor-Leste iha modalide boxe ne’ebé kompete iha SEA Games 2025 hamutuk na’in-sia hanesan Jeremias Mendonça Amaral, Alexandro Meliano da Costa Freitas, Alexandro Jacob, António da Silva, Elísio Gaio, Grigório de Jesus, Domingos Barros, Titánia Quintas no Francisco Lobo.
Jornalista: Natalino Belo
Editór: Xisto Freitas da Piedade
