DILI, 11 Dezembru 2026 (TATOLI)–Prezidente Institutu Nasionál Formasaun Dosente no Profisionál Edukasaun (INFORDEPE), Domingos Martins hateten Bolsa Kandidatu ensinu báziku na’in-30 mak rejeita simu pose.
“Ha’u simu informasaun hosi Diresaun Rekursu Umanu katak iha ema 30 mak rejeita tanba la konkorda ho fatin kolokasaun ne’ebé Ministériu Edukasaun fó. Enkuantu, iha 29 Dezembru ne’e ema ne’ebé prontu atu simu toma pose ne’e hamutuk 625,” Prezidente INFORDEPE dehan resintu ME Vila Verde, Kinta ne’e.
Notísia relevante: INFORDEPE klarifika profesór Bolsa Kandidatu Ensinu Sekundáriu nia preokupasaun kona-ba subsídiu
Nia dehan daudaun ne’e profesór Bolsa Kandidatu Ensinu Sekundáriu balun sei tuir formasaun hela, ne’ebé ramata bele realiza ona serimónia pose.
Entretantu, Diretór Nasionál Rekursu Umanu, João Amaral informa katak ba kandidatu sira-ne’ebé mak la aseita ka rejeita xamada kolokasaun, automatikamente númeru seriasaun kandidatu referidu sei ba liu lista ikus.
Profesór ne’ebé pasa iha teste ne’e hamutuk 1.095, hosi totál 8.779 ne’ebé konkorre ba vaga ensinu sekundáriu. Enkuantu, vaga ne’ebé Ministériu Edukasaun planeia no presiza hamutuk 1.450, sei falta 355.
Jornalista: Osória Marques
Editór: Xisto Freitas da Piedade
