DILI, 11 Dezembru 2025 (TATOLI) – Governu Timor-Leste (TL) no Japaun asina akordu, liuhusi Programa Dezenvolvimentu Ekonómiku no Sosiál, ho objetivu atu reforsa kapasidade operasionál Institutu ba Jestaun Ekipamentu no Apoiu ba Dezenvolvimentu Infraestrutura (IGEADI).
Akordu ne’e asina hosi Ministra Finansa, Santina Cardoso, no Reprezentante Ajénsia Kooperasaun Internasionál Japaun (JICA, sigla inglés) iha Timor-Leste, Daisuke Fukumori, iha salaun auditóriu Kay Rala Xanana Gusmão, iha Aitarak-Laran, Dili.
Ministra Finansa, Santina Cardoso, hateten subvensaun husi Governu Japaun ne’e ho montante millaun $3 hodi apoia serbisu IGEADI nian, liuliu atu sosa mákina pezada sira.
“Apoiu ne’ebé ita hetan ne’e importante, tanba bele tulun serbisu IGEADI nian hodi atende ba situasaun emerjénsia, inundasaun sira, liuhusi brigada sira ne’ebé iha”, Santina Cardoso hateten.
Iha fatin hanesan, Prezidente IGEADI, Ana Paula da Cruz, dehan asinatura ne’e ba apoiu subvensaun nian depois mak ekipa halo koordenasaun hodi haree mákina ida ne’ebé presiza atu sosa.
Tuir nia, akizisaun ba ekipamentu ne’e sei permite intervensaun sira ne’ebé lais liu no efikás iha situasaun emerjénsia sira, aleinde fó apoiu ba projetu pilotu sira ba konstrusaun no hadi’a estrada, hodi promove infraestrutura rodoviária ho kualidade aas no asesibilidade di’ak liu iha territóriu tomak.
“Ita hetan apoiu millaun $3 ho tan tinan oin Governu mós iha osan rasik ne’ebé prevee atu sosa mákina. Entaun ita tenke haree didi’ak mákina ne’ebé presiza sosa hodi halo jestaun di’ak, nune’e tinan oin munisípiu ida bele iha brigada ida kuandu mákina kompletu ona. Nune’e, inundasaun ruma bele atende lalais, tanba daudaun ne’e brigada ida atende ba munisípiu tolu”, dehan.
Nia salienta katak Governu Japaun nia apoiu liuhusi JICA ne’e la’ós foin, maibé dezde 2002. Apoiu hirak ne’e mós iha tinan kotuk disponibiliza mákina pezada 26, daudaun mákina sira ne’e kompletu ona hanesan silindru, eskavadór no seluk tan hamutuk 200-resin.
Reprezentante JICA iha Timor-Leste, Daisuke Fukumori, realsa asinatura akordu ne’e hanesan marka ida ba amizade entre Governu Japaun no Timor-Leste.
“Ha’u fiar katak kooperasaun ida-ne’e sei estimula prosesu adezaun ofisiál ba ASEAN, tanba atu simu delegasaun husi nasaun sira ASEAN nian iha futuru, nune’e infraestrutura maka hanesan komponente xave ida. Ha’u hein katak kooperasaun sei ajuda ita-boot sira no ha’u hein katak kooperasaun ida-ne’e hametin liután ita-nia relasaun”, dehan.
Notísia relevante: Governu Japaun apoia rihun $700 ba Programa Merenda Eskolár iha tinan oin
Jornalista: Arminda Fonseca
Editora: Maria Auxiliadora
