PNTL klarifika kazu jogu online iha ETO Tower  

DILI, 11 Dezembru 2025 (TATOLI) – Komandu Jerál Polísia Nasionál Timor-Leste (PNTL) klarifika, ohin, kona-ba inspesaun ne’ebé ekipa konjunta halo iha edifísiu ETO Tower, ba empreza Capital Venture Timor (CVT) ne’ebé deskonfia halo atividade jogu online.

Portavós PNTL, Superintendente Polísia João Belo dos Reis, hateten ekipa konjuta ne’ebé kompostu husi Polísia Sientífika Investigasaun Kriminál (PSIK), Serbisu Migrasaun no Polísia Forensik, halo intervensaun pur volta tuku 15h00 depoizde simu informasaun kona-ba atividade ne’ebé deskonfia halo iha kuartu balun iha ETO Tower katak iha jogu online.

“Ekipa konjunta halo inspesaun tanba na’in ba ETO Tower señor Nilton Gusmão rasik mak informa ba Polísia katak utilizadór kuartu ne’ebé ema estranjeiru aluga deskonfia iha atividade jogu online. Entaun, kooperasaun ho na’in kompañia ETO mak Polísia halo intervensaun”, João Belo hateten iha konferénsia imprensa ne’ebé hala’o iha Ministériu Interiór, ohin.

Nune’e, bazeia ba informasaun ne’ebé simu ekipa integrada halo buska ba kuartu rua ne’ebé deskonfia fasilita atividade online. “Husi informasaun ne’ebé ita rekolla no atuasaun ne’ebé halo, ita deteta iha duni movimentu ne’ebé deskonfia ba jogu online ne’e. Nune’e, kuartu ne’ebé ita deskonfia ne’e segel kedas, dada police line”, dehan.

João Belo afirma katak atuasaun ne’e konsidera flagrante delitu, no agora kazu ne’e tama iha faze investigasaun. “Ne’ebé,, iha indísiu forte, fasilita duni atividade jogu online mak sei halo atuasaun hothotu tanba lei fó dalan. Prosesu agora la’o hela, espera katak semana oin iha ona evidénsia forte no informasaun sufisiente, ami bele publika ona rezultadu husi investigasaun ne’e”, adianta.

Iha inspesaun ne’e, ekipa konjunta observa katak empreza CVT iha duni lisensa ba atividade jogu online, maibé bainhira rezolusaun Governu nian tun, automatikamente lisensa sira ne’e inválidu no atividade ne’e konsidera ilegál.

Ekipa integrada konsege deteta ema na’in-lima, jerente no na’in ba empreza CVT no traballadór estranjeiru, ne’ebé agora tama ba prosesu investigasaun.

Evidénsia sira ne’ebé foti ona mak dokumentu balun no indikasaun ekipamentu ne’ebé deteta. “Prosesu investigasaun la’o hela, faze tuir, ita bolu jerente, ema sira ne’ebé ita deteta iha fatin ne’ebá, ita sei halo fiskalizasaun ba dokumentu hotu ne’ebé sira iha hodi bele prosesa ba Ministériu Públiku”, afirma.

Notísia relevante: PNTL halo buska no apreensaun ba Edifísiu ETO

Jornalista: Arminda Fonseca

Editora: Maria Auxiliadora