DILI, 10 Dezembru 2025 (TATOLI)—Polísia Nasionál Timor-Leste (PNTL) liuhusi Diresaun Servisu Investigasaun Kriminál Nasionál (DSIKN), Kuarta ne’e, maizumenus tuku 15:00 lorokraik, halo buska no apreensaun iha edifísiu Esperaça Timor Oan (ETO) ne’ebé empreza Capital Venture Timor (CVT) halo aluga no halo atividade, lokaliza iha Mandarin.
Autoridade Seguransa toma medida ne’e tanba simu informasaun katak iha entidade balun ne’ebé aluga edifísiu ETO halo atividade ilísitu hanesan jogu online, ne’ebé antes ne’e Governu liuhusi desizaun Konsellu Ministru deside taka ona.
Ekipa responsável liuhusi atividade ne’e konsege rekolla dokumentu balun ne’ebé nesesita ba prosesu investigasaun.
Notísia relevante : Tribunál aplika medida koasaun tolu ba arguidu na’in-10 suspeitu ba jogu online
Hafoin halo buska no apreensaun, Polísia dada kedan Police line, nu’udar auto apreensaun ba ekipamentu sira hanesan komputadór sira ne’ebé iha sala edifísiu ETO nian.
Nune’e, parte Polísia sei kontinua fali prosesu ne’e iha Kinta (11/12). Ba kestaun ne’e Jornalista Ajénsia TATOLI tenta konfirma asuntu ne’e ba Diretór Servisu Investigasaun Kriminál Nasionál, Superintendente Polísia João Belo dos Reis, via telefone maibé la konsege atende.
Jornalista : Natalino Costa
Editora : Julia Chatarina
