DILI, 11 Dezembru 2025 (TATOLI) – Komandu Jerál Polísia Nasionál Timor-Leste (PNTL), liuhusi Diresaun Tránzitu no Seguransa Rodoviária Nasionál (DTSRN) rekolla, iha semana dahuluk (loron 01-07 Dezembru 2025), reseita hamutuk $9.246, husi infrasaun tránzitu iha territóriu.
Portavós PNTL, Superintendente Polísia, João Belo dos Reis, relata mós reseita ne’ebé mai husi sirkulasaun transporte estranjeiru ne’ebé tama iha fronteira Batugadé, Salele, Sakato no Oesilu hamutuk 268 (viatura pezada 141 no lijeira 127) ho totál $4.344.
Diresaun ne’e mós rejista krime sira iha Sistema Jestaun Insidente Polísia hamutuk 59 ho tipu asaltu 16, violénsia doméstika 15, estraga propriedade haat, asaltu seksuál tolu, no kontrabandu tolu. Kazu asidente rodoviária 40, ne’ebé kauza ema kanek kmaan 43, kanek todan rua, no mate rua.
Fatór prinsipál ne’ebé polísia deteta husi asidente ne’ebé akontese iha públiku mak karreta sira kondisaun ladi’ak, natureza ladi’ak tanba kauza udan, kondutór balun influensia husi álkool no balun la kontrola velosidade kondús transporte.
Polísia Tránzitu no Seguransa Rodoviária halo nafatin fiskalizasaun kontrola movimentu transporte iha estrada públika hodi asegura utilizadór estrada sira. Husi kontrolu ne’ebé halo, Polísia Tránzitu deteta transporte lubuk ida mak halo infrasaun, iha semana dahuluk Dezembru, mak Governu nia rua, transporte privada 149, no transporte públiku 13. Tipu infrasaun ne’ebé kondutór komete no PNTL rejista mak la uza kapasete hamutuk 50, kontra orden autoridade 49, la lori dokumentu 35 no liu prazu 34 no kontra sinál tránzitu 28.
“Movimentu sidadaun estranjeiru ne’ebé tama-sai Timor-Leste ne’ebé Servisu Imigrasaun rejista no kontrola hamutuk 15.652, kompostu husi feto 5.040, mane 7.030. Ema ne’ebé sai husi territóriu Timor-Leste hamutuk 13.119, kompostu husi feto 5.296, mane 7.822”, dehan.
MI apela ba sidadaun partisipa iha manutensaun seguransa durante natál no tinan foun
Ministériu Interiór (MI), liuhusi portavós PNTL, Superintendente Polísia, João Belo dos Reis, apela mós ba komunidade atu partisipa ativa iha manutensaun seguransa durante natál no tinan foun.
João Belo dehan natál mak tempu atu hadi’a relasaun domin, entre ema no ema, hamutuk haforsa espíritu unidade no solidariedade ho família.
Tanba ne’e, Ministériu Interiór husu ema hotu atu selebra loron sagradu ida-ne’e ho pás, respeitu no responsabilidade iha komunidade nia leet. “Husu ba ita hotu atu selebra natál ho espíritu fraternidade simu tinan foun ho esperansa determinasaun hodi kontribui ba pás no dezenvolvimentu iha Timor-Leste”, nia hato’o.
Jornalista: Arminda Fonseca
Editora: Maria Auxiliadora
