DILI, 11 Dezembru 2025 (TATOLI)–Programa Ai-han Mundiál (WFP-sigla ingleza) ho apoiu husi Ministériu Solidariedade Sosiál no Inkluzaun (MSSI) no Ministériu Saúde, lansa ona programa ba distribuisaun Ai-han Nutritivu Espesializadu (SNF) ba inan isin-rua no labarik sira ho idade tinan tolu mai kraik.
Tuir Reprezentante hosi Programa Alimentár Mundiál, Jacqueline de Groot, programa ida-ne’e inísiu ofisiál hosi distribuisaun ai-han fortifikadu sira ho objetivu atu hadi’a nutrisaun inan no oan nian iha Timor-Leste.
“Inisiativa ne’e sei hahú iha Manatutu no habelar bá Aileu, Ainaru, no Baukau, ne’ebé fó ona benefísiu ba inan no labarik ki’ik hamutuk 8.500 ho distribuisaun ai-han fortifikadu tonelada 153, inklui Super Sereál no Super Sereál Plus ai-han fortifikadu no misturadu ne’ebé dezenvolve atu hatán ba sira-nia nesesidade nutrisionál,” nia hateten iha nota komunikadu imprensa hosi Programa Alimentár Mundiál, ne’ebé TATOLI asesu, Kinta ne’e.
Notísia relevante: “Han ai-han nutritivu, moris saudavel”
Iha parte seluk, Ministra Solidariedade Sosiál no Inkluzaun, Verónica das Dores, dehan distribuisaun ne’e sai posivel tanba apoiu jenerozu hosi Governu Fransa, ne’ebé finansia akizisaun ai-han nutritivu espesializadu sira.
“Liuhusi inisiativa ida-ne’e, ami hametin protesaun sosiál no garante katak família vulneravel sira hetan apoiu nesesáriu ba futuru ida-ne’ebé saudavel liu,” nia konklui.
Jornalista: Osória Marques
Editór: Xisto Freitas da Piedade
