Komunidade ejize ba MOP rezolve projetu estrada rurál iha Bobonaru Vila
BOBONARU, 12 Dezembru 2025 (TATOLI)-Populasaun sira ezije ba Ministériu Obra Públika (MOP) atu buka meiu hodi rezolve projetu konstrusaun estrada rurál liga husi merkadu Bobonaru Vila bá suku Ai-Asa, Lour, Sibuni no suku Molok ne’ebé durante ne’e empreza lokál Centelezium Unipessoal Lda abandona.
“Husu ba ita-nia Governu, liuliu ministériu kompetente atu kontinua halo projetu ne’e iha tinan oin. Kompañia ida abandona ne’e labele uza ona, tanba nia soe tiha ona nia serbisu. Se bele bolu fali empreza foun para halo hotu, tanba dalan ne’e liga bá suku haat ka lima. Povu barak mak presiza”, rezidente Bobonaru, Marito de Jesus Afonso, dehan ba Tatoli, ohin.
Nia subliña katak problema ne’e difikulta tebes movimentu komunidade asesu bá merkadu no atividade seluk tan iha tempu udan.
“Estrada ne’e cor rohan-rohan de’it, udan hanesan ne’e ita ho motór atu liu mós ta’uk, tanba tahu, depois karreta ho motór hasoru malu araska, tanba estrada sorin simentu no sorin rai”, nia afirma.
Abitante Inácio Lopes reforsa katak bainhira iha planu atu kontinua, Governu presiza haree empreza ne’ebé kualidade no iha esperiénsia kona-ba konstrusaun estrada, nune’e bele garante kualidade.
“Ami koalia ne’e tanba estrada ne’e kontinua husi perempatan merkadu nia tun mai, sira foin cor de’it mós nakfera, fatuk klikir sai hotu. Tun ba ne’e barak mak aat ona, la hatene ne’e ita bele uza ba tinan naruk ka la’e?”, nia kestiona.
Tuir observasaun jornalista Tatoli, movimentu kontinua normál maski obra ne’e seidauk finaliza tuir esperansa povu nia.
Lembra katak, iha loron 04 fulan-Juñu 2025, Administradór Postu Administrativu Bobonaru, Tomás Barreto Henriques, submete ona pedidu ba Ministériu Obra Públika atu hakotu kontratu ba kompañia ne’e tanba konsidera abandona obra ne’e no serbisu laiha kualidade.
Estrada ho distánsia kilómetru 1,7 ne’e kompañia Centeleziumen ezekuta ho valór kontratu $256.177,08 ne’ebé hahú implementa iha loron 21 Abríl 2022 no data ramata 20 Abríl 2023.
Notísia relevante: Komunidade preokupa projetu reabilitasaun estrada rurál iha Bobonaru vila abandonadu
Jornalista: Sergio da Cruz
Editora: Maria Auxiliadora
