Rekutamentu kontratadu profisionál saúde 269 bazeia ba nesesidade fasilidade saúde
DILI, 12 Dezembru 2025 (TATOLI)—Diretór Jerál Servisu Saúde Koorporativa, Narcisio Fernandes, infroma rekutamentu kontratadu profisionál saúde hamutuk 269 ne’e bazeia ba mapamentu nesesidade fasilidade saúde nian.
Narcisio Fernandes hateten, rekrutamentu ba pesoál saúde bazeia ba mapeamentu nesesidade iha saúde, sira aprezenta tanba fasilidade saúde iha hospitál nasionál no hospital referal sira, ida-idak rekursu seidauk sufisiente nomós sentru saúde sira iha munisípu bazeia ba sira-nia mapeamentu nesesidade rekursu umanu defisil tebes.
Rekrutamentu ne’e sira hakarak haforsa tan servisu saúde enternamentu hodi bele prienxe lakuna sira hodi bele presta servisu di’ak liután ba sosiadade.
“Prosesu dahuluk bainhira simu ona mapeamentu husi hospitál no mós husi sentru saúde munisípiu sir- ne’e tuir orsamentu, ita mós labele responde hotu-hotu ba iha nesessidade rekursu umanu maibé bazeia ba disponibilidade orsamentu ne’ebé iha,” Narsicio Fernandes hateten ba jornalista sira iha nia kna’ar fatin, Kaikoli, ohin.
Nia dehan, antes ne’e atu loke vaga Ministériu Saúde kria komisaun rekrutamentu ida bazeia ba dekretu-lei CPRC nian hodi bele rekolla kandidatu sira-nia dokumentu.
“Komisaun rekrutamentu daudaun ne’e rekolla ona dokumentu no agora iha ona faze avaliasaun dokumentu, tanba kandidatu barak mak aplika, ho nune’e sei halo avaliasaun no espera iha tempu badak sei taka sai rezultadu oinsá mak sira bele ba iha faze tuir mai,” nia hateten.
Diretór ne’e esplika, bazeia politika Ministériu Saúde nian iha postu saúde ida tenke iha pesoál na’in-lima (5), signifika tenke iha médiku ida, tékniku aliadu farmasia no laboratóriu ida no emfermajen ida.
“Ida politika pakote saúde primaria difine katak minimu ne’e iha rekursu ne’ebe presiza iha sentru saúde ne’e iha 18 pesoá iha nível 1, nível 2 no nivel 3 ne’e minimu iha 60-resin, tanba sira mós hala’o servisu enternamentu,” nia informa.
Nia rekoñese nesesidade rekursu umanu iha saúde seidauk to’o maibe depende fila-fali ba orsamentu ne’ebe mak Governu prevee mai iha Ministériu Saúde, tanba iha tinan oin oinsá MS sei halo rekrutamentu ba pesoál saúde nomós haree rekrutamentu permanente sira.
“Prosesu rekrutamentu halo ona iha tinan ida-ne’e no iha ona despaixu depois tinan oin oinsá haree prosesu ne’e maibé depende ba orsamentu,” nia dehan.
Nia mós dehan, sira halo ona analiza forsa de traballu hamutuk ho Komisaun Funsaun Públika nunee bele haree ba área prioridade sira.
Jornalista : Felicidade Ximenes
Editór : Cancio Ximenes
