OEKUSI, 12 Dezembru 2025 (TATOLI) – Hahú husi fulan-Janeiru mai to’o Novembru 2025 Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), rejista kazu abuzu seksuál hasoru minoridade hamutuk 26.
Komandante PNTL RAEOA, Superentendente Asistente Polísia, Angelo Quelo, hateten, husi númeru kazu 26 ne’e kompara ho 2024 kontinua aas, tanba iha 2024 rejista de’it 20 tuun ba kraik.
“Kazu asaltu seksuál nia númeru iha tinan ne’e, sa’e ba 26 kompara ho tinan kotuk tuun,” nia hateten ba jornalista sira iha Komandu PNTL Oekusi, ohin.
Notísia relevante:PNTL Oekusi sei envolve AHDO introdus terminolojia EhD iha sosializasaun
Autoridade seguransa ne’e, esplika, kazu sira-ne’e rejista mai husi komandu PNTL liuhusi sesaun invetigasaun kriminál, rekolla faktu no evidénsia sira iha terrenu hafoin simu keixa direita mai husi vítima sira.
“Autór husi kazu abuzu seksuál ne’e, maioria ema adultu hasoru minoridade, ne’ebé kazu hirak-ne’e kuandu akontese, ita rekolla no simu keixa husi vítima sira, depois ita lori mai komandu PNTL asegura vítima no koopera ho parte Uma-mahon, depois prosesa ba Ministériu Públiku, tanba kazu ne’e sériu, ne’ebé kualker sé de’it mak komete, ida-ne’e laiha valór no laiha perdaun ba situasaun ne’e,” nia afirma.
Notísia relevante:Komandu PNTL nomea Inspetór Xefe Angelo Quelo ba Komandante Interinu Oekusi
Entretantu, husi kazu 26 ne’e, balun sei iha andamentu prosesu julgamentu iha Tribunál Primeira Instánsia Oekusi no balun kumpre ona prizaun.
Jornalista: Abílio Elo Nini
Editór: Rafael Ximenes de A. Belo
