DILI, 12 Dezembru 2025 (TATOLI)–Ekipa futeból femininu Vale de Lahane (VDL) sofre golu ho skor boot 0-11 hafoin kontra S’amuser Football Club iha jogu jornada daualu primeira divizaun Liga Futeból Femininu Timor-Leste (LFFTL) ne’ebé hala’o iha Estádiu Munisipál Dili, Kinta (11/12/2025).
Ekipa VDL joga defensiva maibé antes parte dahuluk ramata konsege sofre uluk golu tolu liuhusi jogadora Demivia Branco iha minutu 42, Dolores Costa 44 no Igilda Ximenes iha minutu 45.
Notísia relevante: VDL FC derrota ho Maranatha 0-10
S’amuser FC ne’ebé to’o jornada dahitu mantein iha pozisaun daruak ho pontu 19 konsege aplika jogu agresivu liután iha parte daruak iha-ne’ebé golu ualu prodús husi jogadora sira hanesan Igilda Ximenes iha minutu 53 no 90+2.
Seluk, golu rua husi Nívia Bahkita iha minutu 62, 87, Leticia Soares 67, Natália Lawa 74, Godelivia Martins 88 no Leticia do Rego iha minutu 90.
Ho rezultadu jogu entre ekipa rua, eleva S’amuser ba pozisaun dahuluk tabela klasifikasaun primeira divizaun LFFTL ho pontu 22, rezultadu husi manán hitu (7) no impata ida (1).
Entretantu, VDL FC kontinua mantein iha pozisaun daualu (8°) ho pontu haat (4) hafoin manán ida (1), impata ida (1) no derrota lima (5).
Jornalista: Natalino Belo
Editór: Xisto Freitas da Piedade
