OEKUSI, 13 Dezembru 2025 (TATOLI)–Polísia Nasionál Timor-Leste (PNTL) liuhusi Unidade Patrullamentu Fronteira (UPF) hamutuk ho Tentara Nasional Indonézia Angkatan Darat (TNI-AD), liuhusi Satuan Tugas Penyamanan Perbatasan (Satgas-Pamtas) sektor barat, sábadu ne’e hala’o patrullamentu konjunta iha liña fronteira Oésilo-Napan, Suku Bobometo, Rejiaun Administrativa Espesiál Oekusi Ambeno (RAEOA).
Notísia Relevante: FOTO ATUÁL: UPF ho TNI idaidak ho nia Bandeira nasaun nian iha fronteira
Komandante Unidade Patrullamentu Fronteira (UPF), Superentenden Xefe Polísia, Euclides Belo, informa patrollamentu konjunta ne’e ho objetivu prinsipál tolu mak atu oberva kondisaun pilár sira no kuadru avisu iha fronteira, hametin liña koordenasaun no garante seguransa ba komunidade iha liña fronteira.
Objetivu dahuluk atu haree kondisaun pilár no kuadru avizu sira-ne’ebé monta ona iha liña fronteira rai rua nian, tanba tempu udan, dezenvolvimentu infraestrutura mós la’o daudaun, nune’e garante katak, pilár sira ho kuadru aviza labele iha mudansa, maibé hafoin observa fizikamente ba pilár haat sira-nia kondisaun garantidu.
Objetivu daruak, patrolamentu koordenasaun ne’e, bele hametin relasaun di’ak entre UPF ho TNI, relasaun di’ak la’os liuhusi komunikasaun de’it maibé tenki hatudu prátika iha terrenu, katak sinerjia TNI ho UPF ne’e iha.
Obejtivu datoluk, atu garante komunidade sira iha liña fronteira atu labele viola regra nasaun nian, tanba iha pilár no kuadru aviza hodi fó sinál katak, idak-idak tenki respeita nia soberania nasaun nian.
“Tanba ne’e nu’udar Komandante UPF agradese ba disponibilidade Komandante Satgas-Pamtas TNI nian, ne’ebé kualker oras no kualker tempu, nia prontu ami bele koopera, tanba ne’e mak agradese ba sira-nia apoia,” nia hateten iha fronteira Oésilo, ohin.
Notísia Relevante: UPF asegura joven 16 ne’ebé tenta ultrapasa fronteira terrestre
Komadante Satgas-Pamtas TNI Sektór Barat, Letnan Kolonel Arh Endis Fahrul Rizal, konfirma katak patrollamentu konjuntu ne’e importante atu garantia seguransa rai rua nian iha liña fronteira.
“Ohin, ami hamutuk ho UPF, hala’o hela patrullamentu konjuntu rutina. Ami kontinua nafatin ami nia atividade antes ne’e iha Wini. Ohin, ami hala’o hela patrulla konjunta iha área Napan. No konsege identifika kondisaun pilár sira, iha fatin tolu. Hanesan ita hotu hatene, ne’e mak fronteira ne’ebé estabelese ona entre nasaun rua ne’e. Objetivu, hanesan baibain, mak koordena komunikasaun entre TNI no UPF hodi mantein seguransa iha liña fronteira” nia hateten.
Notísia Relevante: UPF-TNI halo kooperasaun servisu hodi kontrola fronteira
Entretantu, totál pilár sira iha sektor barat entre Timor-Leste ho Indonézia ne’ebé hahú husi fronteira Wini-Sakato, Oésilo no Pássabe to’o Naktuka-Oépoli hamutuk 585.
Jornalista : Abílio Elo Nini
Editór : Cancio Ximenes
