BOBONARU, 12 Fevreiru 2025 (TATOLI)—Polísia Nasionál Timor-Leste, Unidade Patrulamentu Fronteira (UPF) to’o ágora nafatin iha relasaun di’ak no amigavél ho Satuan Tugas Peyamanan Perbatasan Tentara Nasional Indonesia (TNI, sigla Indonézía), tanba parte rua sempre halo kooperasaun no kolobarasaun servisu hodi kontrola no asegura seguransa iha fronteira rai-maran.
Komandante Polísia Unidade Patrulamentu Fronteira (UPF), Superintendente Polisía Euclides Bello, hateten daudaun ne’e seguransa iha liña Fronteira la’o ho di’ak.
Notísia Relevante: UPF-TNI organiza patrullamentu iha fronteira Tapo-Memo no Delomil
“UPF servisu Lina Fronteira iha kooperasaun di’ak ho parseiru servisu liuliu TNI. Ita haree husi mídia sosiál, kolega sira husi TNI Satgas PAMTAS RI-RDTL nian ne’ebé koloka iha fronteira, sira halo vizita mós mai postu UPF sira, halo kolaborasaun, kooperasaun. Ida-ne’e, hatudu ita-nia relasaun ne’e di’ak tebe-tebes ho nasaun Viziñu. La’ós iha Maliana ho Suai de’it maibé iha Oekusi ms ita-nia kolega UPF sira halo asaun hanesan, vizita ba-mai, halo koordenasaun ba asuntu sira-ne’ebé garante dignidade seguransa nasaun ida-idak nian,” Superintendente Polisía Euclides Bello hateten ba jornalista sira, iha Saburai, tersa (11 Fevereiru 2025) ne’e.
Nia rekoñese, maske UPF sei enfrenta problema falta rekursu umanu maibé ho esperiénsia komandante Kompañia no komandante postu, sira hatene no koñese di’ak ona karáter hotu-hotu kona-bá natureza, jeografíka fronteira no pilár hirak ne’ebé monta iha liña fronteira.
Mandatu ba PNTL liuliu Unidade Patrullamentu Fronteira (UPF) ne’e foti husi Governu Konstitusionál IV nia Dekretu-Lei nú. 9/2009, 18 Fevereiru, kona-ba lei orgánika Polísia Nasíonál Timor-Leste, artigu 33 Funsaun husi UPF hala’o patrullamentu no vijilánsia iha fronteira territoriál sira, no iha koordenasaun no kooperasaun ho parte interresada sira seluk espesialmente ho F-FDTL.
Kontrola movimentu ema no sasán sira iha fronteira territoriál, ho koordenasaun no kooperasaun ho Servisu Migrasaun no Alfándega, koopera mós ho autoridade administrativa relevante sira seluk tuir lejizlasaun fiskál, aduaneira no sanitaria.
Aplika lei sira relasiona ho tráfiku umanu, tráfiku droga ilegál, tráfiku kilat no atividade kriminál organizadu sira seluk. Fó seguransa iha aeroportu hodi hala’o patrulla hale’u pista, terminál no aeroportu ho kooperasaun hamutuk ho parte interersada sira seluk no kna’ar lejítimu sira seluk tuir nia misaun.
Notísia Relevante: UPF-TNI sei realiza jogu amizade iha fronteira
Jornalista : Sérgio da Cruz
Editór : Cancio Ximenes
