DILI, 15 Dezembru 2025 (TATOLI)-Komité Orientadór (CO25) organiza, entre loron 15 no 19 Dezembru, espozisaun no reflesaun frente klandestina ho tema “Juventude no Luta Esperansa Povu”, iha Faról, Dili.
Objetivu husi eventu ne’e atu organizasaun klandestina sira ne’ebé hamahan an iha CO25 bele fahe sira-nia hanoin, esperiénsia iha prosesu luta ukun-rasik an no aprezenta espozisaun sira ba públiku hodi jerasaun foun sira hatene.
Prezidente CO25, Constâncio Pinto, hateten momentu ne’e mós organizasaun frente klandestina bele reafirma sira-nia ezisténsia durante prosesu ba luta libertasaun nasionál iha frente armada, diplomátika no klandestina.
“Maibé, depois ita-nia restaurasaun indepedénsia, ita rona mak frente armada no diplomátika no frente klandestina kuaze naran laiha tiha de’it”, nia hato’o iha abertura eventu ne’e iha salaun HAK, Faról, ohin.
Nia realsa katak frente klandestina nia kontribuisaun maka’as tebes iha prosesu luta no dezempeña mós papél polítika, kontribui mós ba desizaun polítika balun ne’ebé iha impaktu.
“CO25 hetan knaar husi Sestu Governu atu halo peskiza no hakerek istória partisipasaun juventude iha luta libertasaun”, relembra.
Hodi salienta katak Komité halo ona livru volume neen, ne’ebé seidauk publika no ida hein publika no kontinua halo peskiza nia laran. Komité sente importante tebes atu kontinua habelar istória luta libertasaun ba frente tolu.
Ho atividade ne’e aborda kona-ba frente klandestina nia papél luta ba indepedénsia nian no reflesaun ho oradór lubun. “Informasaun sira ne’ebé sai husi reflesaun no espozisaun ida-ne’e kontribui ba Komité Orientadór 25 nia peskizadór sira, liliu livru volume haat atu hadi’a no enrikese liután, presiza hatuur ita-nia istória ne’ebé loloos”, hateten.
Deputadu husi Partidu Frente Revolusionária Timor-Leste Independente (FRETILIN), David Dias Ximenes ‘Mandati’, sente emosiadu ho organizasaun frente klandestina ne’ebé halibur hamutuk hodi halo reflesaun ba atividade atu lao ba oin, maibé la sura terus no kolen.
“Terus no kolen ne’e ita-nia obrigasaun, ita la tuir ema ida no la la’o ho ema ida. Ita sira ne’e la’o hamutuk, embora jerasaun mak diferente, maibé espíritu no hakarak hanesan”, katak.
Nia relembra frente klandestina nia determinasaun bainhira halo funu no konxiente laiha ekipamentu adekuadu halo ligasaun oioin husi vila laran ho FALINTIL sira no asaun seluk tan hanesan masakre Santa Krús iha 12 Novembru hodi loké mundu hatene kona-ba sofrimentu povu Timor-Leste nian.
“Ne’e mak ita kontinua buka malu nafatin atu ko’alia buat sira ne’e, responsabilidade ita-nian hotu”, tenik.
Tuir nia, reflesaun ne’e atu hamutuk husu responsabilidade saida mak presiza halo ba futuru.
Maria Teresa, nu’udar estudante kontente partisipa eventu ne’e importante tebes hodi hatene istória país nian ne’ebé liuhusi prosesu naruk ba hetan indepedénsia.
Partisipante iha eventu ne’e mai husi organizasaun frente klandestina sira, estudante universitáriu no seluk tan.
Iha atividade ne’e, oradór lubun halo aprezentasaun kona-ba papél frente klandestina iha luta ba ukun-rasik an.
Jornalista: Nelson de Sousa
Editora: Maria Auxiliadora
