Ministériu Saúde halo ona pagamentu ba profisionál saúde 2.016 iha Timor-Leste
DILI, 15 Dezembru 2025 (TATOLI)—Ministériu Saúde halo ona pagamentu ba Profisionál Saúde hamutuk rihun 2016 ne’ebé mak servisu iha ospitál referál no mós sentru saúde sira iha Timor-Leste.
“Kona-ba pagamentu ba profisionál saúde sira-ne’ebé mak durante ne’e hetan lamentasaun oioin husi profisionál saúde sira, entaun Ministériu Saúde halo ona pagamentu ba sira durante fulan rua nia laran no ikus mak fulan dezembru nian,” Diretór Jerál Servisu Kooperativu iha Minsitériu Saúde, Narcisio Fernandes, dehan ba jornalista sira iha nia kna’ar fatin, ohin.
Nia hateten, bazeia ba rezolusaun kona-ba progresu profisionál saúde sira-nian, Ministériu Saúde hahú iha loron hirak ne’e pagamentu halo hotu ona.
“Ba sira-nia ne’ebé mak klasifikadu iha ne’ebá, katak klasifikadu ne’e depende ba vaga ne’ebé mak iha, entaun sira sei haree tuir fali, tanba ida-ne’e mak pagamentu halo uluk ba Profisionál saúde hamutuk 2.016, ne’ebé mak tuir rezolusaun hasai ona,” nia infoma.
Nia haktuir, pagamentu la’o tiha ona espera katak se bainhira sira-nia saláriu tama, osan ne’e mós tama hotu ona konta bankária ida-idak nian.
“Maibé iha mós reklamasaun husi profisionál saúde sira, ami konsidera tanba iha momentu sira halo reklamasaun ne’e, ami sei haree para depois ita bele hola pagamentu fali. Reklamasaun hamutuk hirak ha’u ladún lembra tanba reklamasaun to’o agora mós tama hela de’it,” nia haktuir.
Ho progresaun ne’ebé mak iha hotu-hotu hakarak hadi’a sira-nia servisu, tanba Ministériu Saúde nafatin konsidera no tau atensaun ba servisu no kareira profisionál saúde no haree mós sira-nia habilitasaun literária.
“Nomós formasaun sira no mós ba avaliasaun dezmpeñu presiza ba oin haree didi’ak liga ho sira nia habitasaun literária no profisionálismu ne’ebé ami sei konsidera nafatin iha faze sira tuir mai ba iha profisionál saúde, ne’ebé hotu sei iha direitu,” nia esplika.
Antes ne’e, Ministra Saúde (MS), Elia dos Reis Amaral, hateten Konsellu Ministru kuarta ne’e, iha Palásiu Governu Dili diskute no aprova rezolusaun Governu kona-ba vaga promosaun ba profisionál saúde hamutuk 2.016.
“Ami finaliza ona no termina katak presiza atu halo tan rezolusaun Governu ida lori mai Konsellu Ministru kona-ba fiksasaun ba vaga. Entaun vaga sira-ne’ebé mak ita aprezenta no profisionál saúde hamutuk 2.016 mak sei sai promovidu, atu hasa’e sira-nia eskalaun no grau,” Ministra Elia hatetem ba jornalista sira,
Rezolusaun Governu nian ne’ebé aprova tuir Dekretu-Lei númeru 31/2025, 24 Setembru, define númeru husi vaga ba promosaun profisionál sira iha karreira médika, enfermajen, parteira profisionál no tékniku diagnóstiku, terapéutika no saúde públika, iha ámbitu rejime espesiál funsaun públika nian.
Medida ida-ne’e kumpre kompromisu Governu nian atu valoriza profisionál saúde sira no asegura rekoñesementu ba sira-nia méritu no durasaun servisu nian, hodi promove motivasaun, retensaun no estabilidade husi kuadru sira-ne’e, ne’ebé kualifikadu tebes iha Servisu Nasionál Saúde nian.
Iha totál, estabelese ona vaga promosaun hamutuk 2.016, ne’ebé fahe entre karreira diferensa hanesan karreira Médika ho vaga 376, karreira Enfermajen ho vaga 985, karreira Parteira Profisionál ho vaga 293 no karreira Tékniku Diagnóstiku, Terapéutika no Saúde Públika ho vaga 362.
Jornalista : Felicidade Ximenes
Editór : Cancio Ximenes
