DILI, 15 Dezembru 2025 (TATOLI)—Ministru Asuntu Kombatente Libertasaun Nasionál, Gil da Costa Monteiro “Oan-Soru”, hateten prosesu pagamentu benefisiáriu (kombatente) idak-idak bele bá halo levantamentu iha banku munisipál bainhira simu ona fixa pagamentu (resibu) iha Diresaun Nasionál Pensaun Subvensaun (DNPS).
“Bainhira dokumentu komprovativu sira loos hotu ona, maka prosesu pagamentu tuirmai benefisiáriu idak-idak bele bá ona halo levantamentu iha banku ne’ebé mak sira pertense ba. La presiza ona mai iha ministériu,” Ministru Oan-Soru dehan ba jornalista sira iha nia kna’ar fatin, Komoro, Dili, Segunda ne’e.
Nia dehan, prosedimentu sira kona-ba atu halo levantanmentu osan ne’e mak benefisiáriu sira mai konfirma dadus iha DPNS, haruka tékniku sira imprime fixa pagamentu nian no lori fixa ne’e bá iha banku ne’ebé sira loke konta ba, nune’e banku bele prosesa pagamentu.
Notísia relevante: Ohin, kombatente 15.697 simu fixa pagamentu atu simu direitu pensaun
Gil esplika Ministériu Asuntu Kombatente Libertasaun Nasionál (MAKLN) realiza prosesu pagamentu ida-ne’e to’o iha tinan 2026 no kada loron atende másimu ema na’in-700.
Iha biban ne’e, ministru apela ba kombatente sira atu nafatin iha dixiplina no pás nune’e la’o tuir prosedimentu sira-ne’ebé iha ona.
Oráriu ne’ebé atu paga tuir kada munisípiu nian mak tuirmai ne’e: Aileu iha 15/12/2025; Ainaru 16/12/2025; Baukau 18/12/2025; Bobonaru 19/12/2025; Kovalima 23/12/2025, Dili 29/12/2025; Ermera 9/1/2026; Lautein 12/1/2026; Likisá 19/1/2026, Manatutu 21/1/2026; Manufahi 22/1/2026; Oekusi 23/01/2026, Vikeke 26/12/2026.
Jornalista: Osória Marques
Editór: Xisto Freitas da Piedade
